GALAK… Rundi rindu meda pengalak buah terung Dayak ti bisi dipandang ba Karnival Kaul Bumai kemari – GAMBAR GHAZALI BUJANG

KOTA PADAWAN: Opis Menteri Industri Pemakai, Komoditi enggau Pemansang Kandang Menua Sarawak (MFICORD) ngangkatka tanah Semenggok nyadi palan matih pelatih sektor betanam betupi.

Menteri MFICORD, Datuk Seri Dr Stephen Rundi Utom andalka bala pelatih ulih ngubah gaya orang bumai ba Sarawak nengah latih nya ila.

“Pelaba aku tentu kita nemu baka ni chara pengawa betanam betupi dikereja sebedau tu.

“Ari nya tadi, baka ni kitai deka ngubah ngambi ulih mansutka asil meruan agi, ari sukut kualiti enggau standard produk patut diperunding,” ku iya.

Rundi nibarka jaku nya ba aum pemberita pengudah dipebasa bejadika Karnival Kaul Bumai Institut Betanam Betupi Sarawak, ditu, pagi kemari.

Iya madahka diri andal ulih nempa abis nadai 25 ngagai 50 iku pelatih ninting taun ari pemisi palan latih nya ila.

Suara Sarawak