PAKAN: Siku lelaki beumur 85 taun dikenuku bebadi nyawa ba penusah aksiden di Simpang Graji, Jalai Betong-Sarikei.

Nitihka ripot ari Balai Bomba enggau Penyah Penusah (BBP) Betong, tudah ke bebadi ngena motosikal nya benama Abik Kundat.

“Kami nerima kangau ngenyit ari siku orang periman madahka bisi penusah aksiden nyadi urung pukul 10.45 pagi tadi.

NGESAH PENUSAH… Bomba mantu ngangkatka tubuh tudah ti bebadi ba penusah aksiden di Simpang Graji, Jalai Betong-Sarikei, pagi tadi.

“Berebak enggau nya, lapan iku raban ari Tim Charlie Bomba Betong udah datai ngesah penusah nya enggau lengkas,” ku Komander Operasyen Koni Jayang.

Ku Koni, tudah ti nepan motosikal nya belantak enggau sebuah kerita pikap ti ditepan empat iku lelaki ba rantau jalai ari Kuching nuju Bintulu.

“Sida aksiden ba selingkut jalai P ngujungka tudah Abik dikenuku parai tekala nya,” ku iya.

Koni mega madah, Bomba datai kia semina ngiga penerang enggau meresi palan penusah nya nyadi laban nadai orang mengkang dalam kerita.

Pia mega ku iya, sida ti nepan kerita pikap nya nadai diripotka bakal lalu tubuh tudah ke bebadi nya udah dibai ngagai polis ngambi bejalaika pansik bukai.

Entara ejensi ti sama mantu Bomba ngesah penusah tu iya nya tiga iku staf ari Opis Pengerai Malaysia (KKM) Betong enggau empat iku raban Polis DiRaja Malaysia (PDRM) Betong.

Suara Sarawak