TAJA pen gawa ngintu ruang bilik tang nya enda nagang siku indu ngubah nasip ruang bilik.

Sofiah Sahar, 40, ti gawa ngintu ruang bilik mutus ati bejalaika dagang kek dikena nambahka penatai pemisi sida sebilik.

Pengerindu ngaga kek udah meransang Sofiah bejalaika dagang kek ari rumah ti diberi nama Sofia Bake.

PEMUNGKAL Sofia Bake, Sofiah Sahar.

“Aku bejalaika dagang tu laban sigi ngembuan pengerindu ngaga bemacham kek.

“Tambah mega, jaku peransang enggau sukung ari indai udah meransang aku enda mantul ati sereta majakka singkang ba dunya dagang kek tu.

“Indai mih nyadika tiang sukung aku ngelama tu, iya meruan ba tisi aku sekalika maya aku senang tauka tusah.

“Indai mega meda pejalai aku ari pengerindu ngaga kek diatu nyau nyadika dagang sereta dikena nambahka penatai pemisi.

“Terima kasih indai laban sukung nuan meri besai reti nentuka pejalai dagang aku makin maju baka pedagang bukai,” ku iya.

SOFIA BAKE

Pia mega, Sofiah madahka diri ngaga enggau nyual kek tu ari rumah aja laban ngintu indai iya benung sakit.

“Kek ti dijual aku tau dikumbai kek bajet laban ulih dibeli semua orang.

“Kebuah pia laban ukai semua orang ulih meli kek dikena ngintu hari pengada tauka pengerami bukai,” ku iya.

KREATIF…Kek hari pengada digaga Sofiah.

Iya enda ngadang dagang kek ti berengkah ditumbuh ba taun 2017 suba ulih beretan lama nyentuk sehari tu.

Taja pen semina dipejalaika nengah online tang timbal ari bala penguna chukup manah laban tepantup ati enggau penyamai kek digaga iya.

“Aku nyual bemacham bansa kek nitihka peminta penguna.

“Tambah mega, aku naka ulih nangkup peminta bala penguna ti ngasuh ngaga kek hari pengada, pengerami melah pinang enggau ke bukai.

“Rega kek tu nitihka pemesai enggau chura dikedeka bala penguna,” ku Sofiah.

JULUK ATI

Taja pen napi penanggul sekumbang bejalaika dagang kek tang lebuh nerima timbal ti manah ari bala penguna, nya mih ti ngasuh Sofiah majak ransing ngemansangka dagang diri.

“Sekumbang Atur Mindah Betagang (PKP) benung terit ketegal pengerekai Covid-19, aku nadai ulih bejalaika dagang tu laban enda ulih mindah nganjung kek ngagai penguna.

“Kelimpah ari nya, aku mega napi penanggul besemekih enggau bala pedagang kek bukai.

MANAH…Kek pengerami melah pinang dikedeka penguna ti digaga Sofiah.

“Enti bisi jereki dudi hari, aku deka numbuhka sebuah kedai bakeri ngena nama Sofia Bake ngambi majak dikelala mensia mayuh,” ku Sofiah madahka juluk ati iya.

Nya alai, mensia mayuh ti deka nyepi penyamai tauka meli kek ari Sofiah, kita diperansang ngiga iya ba lumur, 010-9749441 tauka ngelawa Facebook Sofia Bake.

Suara Sarawak