Smart Reader Kids Jalai Berjaya

PEKARA pelajar beguna amat ba pengidup kitai mensia nentuka kitai bulih pengidup ti menyana dudi hari.

Pia mega, pengawa besekula ngiga pemandai mega besai reti ngambi ulih ngangkatka diri, raban bansa enggau menua.

Nya alai, serak tu kitai deka ngelala sebengkah palan nyeridi anak di mengeri Sibu dikumbai Tadika Minda Berjaya Smart Reader Kids.

Lebuh ngerandau pengempu tadika tu, Helena Thomas Salang madahka palan tu ditumbuh ungkup apai indai nganjung anak sida ti beumur tiga ngagai enam taun belajar ditu.

“Diatu kitai bela nemu, pelajar tumu chukup beguna nyendiaka sida masuk primari satu sekalika ba sekula perintah tauka peribit.

HELENA THOMAS SALANG

“Palan tu mega ulih endur apai indai nembiak ti gawa nganjung anak laban anak sida iya deka diibun, diajar macha enggau ngira.

“Kelimpah ari nya, ulih narak minat nembiak mit rindu belajar,” ku Helena.

Helena ti nyadi Direktor Serikat TS Hopscotch Sdn Bhd madah, iya endang ngembuan minat ba pekara pelajar anak mit laban nemu penanggul ditapi apai indai ngibun anak sida kelebih agi apai indai ti gawa.

“Aku nemu penanggul bala apai indai ti gawa lalu nadai palan endur nyaga anak sida iya, nya alai aku muka palan tu dikena nyendiaka servis ngagai bala apai indai.

“Kelebih agi aku suba kala ngasaika penanggul tu laban bisi nembiak mit lalu nadai orang ngibun maya aku nurun kereja, nya alai aku meretika penanggul diasaika sida,” ku Helena.

NYERIDI NEMBIAK MIT… Nembiak mit ti dianjung belajar ditu deka diajar bemacham pengelandik baka macha, ngira enggau ke bukai.

Helena ti ngembuan pelajar Bachelor (Sc) of Applied Chemistry ari UiTM madah, kelimpah ari nembiak mit, sida ti beumur tujuh ngagai 12 taun pen tau belajar kitu ngambi kelas tambah.

Iya madah baru, entara subjek bisi diajar ba palan tu baka Jaku English, Jaku Melayu, Matematik, Mandarin enggau subjek ke bukai.

Pemanah ba palan tu ku Helena, bisi nyediaka program belajar online kelimpah ari ngajar chara begulai enggau bala nembiak.

Mayuh aktiviti ulih diatur ba palan tu baka belajar bejaku ba mua mayuh, belajar nyepil, macha enggau utai bukai ungkup nembiak.

“Smart Reader Kids tu mega dikelala sebuah palan nyeridi nembiak belajar ngena Jaku English.

AKTIVITI BARU… Bala nembiak mega diajar ngembuan runding inovatif enggau kreatif.

“Nembiak ti belajar kitu endang diajar Jaku English,” terang Helena.

Nerang pasal pakej disedia, Helena madahka pakej nya bisi ari umur tiga ngagai enam taun.

Iya mega madah, pakej tu mega disedia dataika nembiak nemu macha enggau landik bejaku ngena Jaku English.

Barang sapa ti deka nganjung anak belajar kitu, tau ngelawa palan tu empu ba adres, 1B Jalai Berjaya, Pasar Sibu.

Kita mega tau telefon nuju Helena ba lumur 017-3378969 enggau Anathassia ba lumur, 013-8901524.

PENEMU BARU… Bala nembiak ba Tadika Minda Berjaya Smart Reader Kids rindu belajarka penemu baru lebuh dibai ngelawa Balai Bomba enggau Penyah Penusah (BBP) Sungai Merah.

Suara Sarawak