NOVEL LYNDON

KUING pengawa ditegika Gempung Parti Sarawak (GPS) nyata dipeda ba tiga pekara besai.

Nya nyengkaum nambahka pemansang infrastruktur pemun nengah model pemansang menua pesisir ngagai mengeri, pejalai Sempekat Malaysia 1963 (MA63) lalu ketiga pemansang modal mensia enggau kuasa ulih dikemaru.

Chairman Palan Pansik, Pemansang, Rama enggau Rampa Menua Fakulti Sains Sosial dan Kemanusiaan, Universiti Kebangsaan Malaysia, Prof Madya Dr Novel Lyndon madah, tiga pekara nya deka nentuka GPS meruan tegap megai enggau ngemansangka Sarawak.

“GPS mesti nambahka agi pemansang infrastruktur pemun nengah model pemansang menua pesisir ngagai mengeri.

“Menua pesisir mesti disikap ngena infrastruktur seikas mengeri baka jalai alun, projek rumah rayat, nambah enggau negapka kaunsil kandang menua enggau opis pelilih ti deka meri servis ngagai rayat nengah model nya,” ku iya.

Dr Novel madah, perati mega mesti diberi ngagai peneras sambung arus penyambung enggau penyampat ngaga sambung jalai kebun ba menua pesisir.

Ba pejalai MA63 ku iya, GPS mesti nentuka Perintah Besai setuju ngaduka pengawa ngambi pekara ti ditagih deka diberi pulai lalu bejalaika sempekat nengah atur tauka polisi ti engkeman.

“Nya alai, pekara tu anang semina naka mulut nyebut aja tang enda tau enda dipejalai nitihka atur ti meruan.

“Leka jaku ‘Sarawak First’ tauka ‘Ngenuluka Sarawak’ ti nyadi agenda GPS patut nyadika lalau ba pengawa ngagihka pemansang sebela ngagai rayat menua tu,” ku iya.

Suara Sarawak