KAUL TEGUH…Khairuddin enggau Sabarudin besilih MoU.

SIBU: Universiti Teknologi Sarawak (UTS) sekali agi nempa pemujur pengudah nanggam kerejasama enggau New York Institute of Finance (NYIF) sereta NIUFU Consulting Management (M) Sdn Bhd (NIUFU).

Mandal Chanselor UTS, Profesor Datuk Dr Khairuddin Abdul Hamid madah, kerejasama enggau NYIF sereta NIUFU nya inisiatif UTS nyendiaka mayuh agi akses ba pengawa nyendiaka setipikit profesional ngagai staf enggau nembiak.

Khairuddin madah, NYIF nyendiaka latih betikas dunya ngagai bala profesional ba pekara wang enggau industri bekaul.

“NYIF mega sebuah organisasyen keterubah dunya meri latih profesional senentang pengawa dagang enggau pekara wang sereta udah ngerembaika servis sida ngagai serata dunya.

“Nengah kerejasama tu, NYIF deka nyendiaka kus praktikal, pelajar enggau penemu pakar bekaul industri pekara wang.

“Staf enggau nembiak ti nembuka kus tu deka diberi setipikit ari NYIF ti diaku ba tikasdunya sereta dikeandal organisasyen pekara wang entarabansa.

“Sida deka nyadi bakih alumni dunya NYIF ti nyulut. Nengah kaul enggau bakih kunsi palan pelajar tinggi nya, NYIF deka nyendiaka program pelajar begulai enggau palan pelajar tinggi ti udah dipilih ba Amerika Syarikat,” ku iya.

Khairudin mansutka jaku nya ba Program Nyain Sempekat Pemereti Ati (MoU) entara UTS, NYIF enggau NIUFU, ensanus.

Suara Sarawak