Abdul Karim mantaika pengandal nya lebuh ditanya pemberita ba aum pemberita Bengkel Pekit Kaligrafi Arab enggau Kaligrafi China Renggat Nasional 2022, ditu tadi.

KUCHING: Sarawak ngandalka penuduk empat menteri penuh ari Gempung Parti Sarawak (GPS) diberi baka selama taja Kabinet Perintah Besai baru deka mit agi.

Mandal Presiden Parti Pesaka Bumiputera Bersatu (PBB), Datuk Seri Abdul Karim Rahman Hamzah madahka diri pechaya ngagai Menteri Besai Datuk Seri Anwar Ibrahim enda ngelebu pengandal bala tuai GPS nya.

“Baka udah dipadahka Premier Sarawak Datuk Patinggi Tan Sri Abang Johari Tun Openg kemari, arapka empat penuduk menteri penuh ari Sarawak agi baka selama taja kabinet mit agi.

“Enti penyampau penuduk nya agi baka selama, tu tentu pulaika pemanah ngagai nengeri tu,” ku iya.

Abdul Karim ti mega Menteri Dagang Temuai, Industri Kreatif enggau Seni Pemerindang mantaika pengandal nya lebuh ditanya pemberita ba aum pemberita Bengkel Pekit Kaligrafi Arab enggau Kaligrafi China Renggat Nasional 2022, ditu tadi.

Iya madah, tanggungpengawa besai disan Menteri Besai Ke-10 ngaga pemutus numbuhka kabinet ti ngemantupka ati semua parti ba Perintah Penyerakup nya.

“Tang aku pechaya Menteri Besai enda deka ngelebu pengarap bala tuai GPS enggau Perintah Sarawak.

“Lalu aku pechaya Kabinet baru tu deka ngemantupka ati semua parti dikaul,” ku iya.

Dulu ari nya Premier Sarawak lebuh dirandau pemberita madahka sida udah mantaika pengandal ngagai Menteri Besai ngambi ngetanka empat penuduk menteri penuh kabinet baru ngagai GPS.

Suara Sarawak