NGELANCHAR… Abdul Karim (tengah) disempulang bala bukai lebuh dipebasa ngelancharka Bup Malin Pejalai Sarawak ditu, tadi. GAMBAR RAMIDI SUBARI.

KUCHING: Perintah Sarawak dikeandal ransing agi ngemanahka sambung arus internet menua tu kelebih agi ba menua pesisir.

Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah madah, pekara nya beguna amat ngambi ulih ngerembaika sektor dagang temuai menua.

Ku iya, penanggul arus penyambung nya udah nyadi penekul Sarawak laban menua tu kelalu besai.

“Kitai bisi sekeda ejensi ti endang ngatur pengawa ngatur arus penyambung tu, laban program baka Sarawak Road Trip tu sebagi ari produk dagang temuai menua ti begunaka arus internet.

“Temuai beguna ‘waze’ enggau ‘google’ laban ari nya sida ulih nemu sesebengkah palan dagang temuai ti bisi ba sekeda palan ditu,” ku iya.

Karim bejaku munyi nya ba aum pemberita rambau bejadika Sarawak Road Trip di Waterfront Kuching ditu tadi.

Ku Karim, sekeda menua baka di Kuching, Samarahan enggau Bau pekara pasal internet tu enda tentu iga nyadi penanggul tang palan baka di Sibu enggau Kapit endang bisi napi penanggul nya.

“Ambika chunto, lebuh deka ngetua ba sebuah rumah panjai, internet nadai din, temuai mar deka ngelawa, bulih penerang enggau nemuai ngagai rumah panjai nya.

“Baka nya mega ba Miri, di mengeri Miri empu internet endang manah tang lebuh temuai ngusung Baram enggau Niah penanggul tu deka ayan.

“Aku andalka bala ejensi ti ngempu tanggungpengawa ngaduka pengawa tu ulih bejalaika pengawa sida awak ulih mantu industri dagang temuai menua kitai,” ku iya.

Suara Sarawak