Abang Johari Tun Openg

KUCHING: Perintah Gempung Parti Sarawak (GPS) deka seruran nyaga hak ba jalai pengarap rayat menua tu lalu enda nyaga sebarang ulah ekstrimisme sebarang jalai pengarap nyadi ditu.

Premier Sarawak Datuk Patinggi Tan Sri Abang Johari Tun Openg madah, nyadi tuai perintah iya besemaya lalu nyamin semua pekara nya deka terus dijaga.

Ku iya, pekara nya beguna amat nentuka pengelantang raban bansa, penyerakup rayat enggau jalai pengarap ba Tanah Kenyalang terus dijaga meruan.

“Kitai chukup betuah laban dipandung ari penyarut ba jalai pengarap enggau raban bansa ti suah nyadi ba menua bukai laban kuasa otonomi imigresyen dia kitai ulih nyekat penatai sida nya kitu.

“Taja pia Sarawak ukai kebal belama ari pengawa ekstremis ti datai nengah siber baka media rama ti suah dikena sekeda orang politik beambi.

“Nya alai, ngena pemintar runding kitai empu nyerenih enggau mantis penerang ti dikerembai sebelah media rama,” ku iya ba Pesan Krismas enggau Taun Baru 2023, kemari.

Abang Johari madahka Sarawak deka seruran ngetanka pemanah nama ti tebilang diuan pupu bansa megai jalai pengarap ti kuru ari sebarang ulah enda menuku.

“Semina kitai ba Sarawak aja ulih begulai bebaik baka diri sebilik baka raban orang Kristian begulai enggau orang Islam ulih idup seperabung,” ku iya nyemetak.

Suara Sarawak