MILIH KABINET… Anwar mantaika rintai menteri kabinet ti betuaika iya pukul 8.15 malam tadi

KUCHING: Lima iku Kaban Parlimen ari Gempung Parti Sarawak (GPS) dipadu nyadi menteri penuh ba Kabinet Perintah Penyerakup betuaika Menteri Besai Ke-10 Datuk Seri Anwar Ibrahim.

Baka disadang sebedau tu, Datuk Seri Fadillah Yusof dipadu nyadi Sapit Menteri Besai enggau ngetuaika Opis Menteri Pengawa Bekebun enggau Komoditi.

Pia mega Datuk Seri Alexander Nanta Linggi enggau Datuk Seri Nancy Shukri agi dikeandal nyadi menteri penuh taja bebida opis menteri.

Nanta dilempai pangku pengawa Menteri Kereja Raya seraya Nancy ngetuaika Opis Menteri Pemansang Orang Indu, Ruang Bilik enggau Komuniti.

Seraya Datuk Aaron Ago Dagang ti sebedau tu nyadi Sapit Menteri Pengerai II udah dipadu nyadi Menteri Penyerakup Bansa lalu Datuk Seri Tiong King Sing ti nyadi Duta Khas Malaysia Ke China sebedau tu dipilih nyadi Menteri Dagang Temuai.

Rintai nama sida nya udah dibantaika Anwar empu ba aum pemberiga diatur ba Putrajaya urung pukul 8.15 malam tadi.

Dalam rintai kabinet nya, Anwar ti mega Kaban Parlimen Tambun madahka kelimpah nyadi menteri besai iya mega nyadi Menteri Pekara Wang.

Siku da Sapit Menteri Besai iya nya Datuk Seri Zahid Hamidi ari Barisan Nasional (BN).

Kabinet Malaysia sekali tu ngerintaika 28 opis menteri sepengudah Anwar dipadu nyadi Menteri Besai kena 24 November tu tadi.

Suara Sarawak