PEKIT bot laju udah nyadi buah randau mensia mayuh ba selampur Pulau Borneo lalu patut dipasuk nyadi pekit diatur ninting taun ba Kalinder Dagang Temuai Malaysia kelebih agi Sarawak.

Tang, bala peminat enggau pemacha mayuh tentu bedau nebu bakani chara ngaga bot laju ti suah dikena belumba berebutka trofi enggau gelar.

NYADIKA PENGINGAT…Mungo Jelani begambar enggau bot laju dikena iya belumba beserimbai enggau Sarikei Power Boat 2016.

Serak tu, Ruai Suara Sarawak mai peminat enggau pemacha bekelala enggau siku orang ti landik ba tunjuk jari, pandai nengkebang bot laju.

LANDIK

Mungo Jelani ti tampak agi dikangau Aba Orion nya siku bansa Iban ti landik endar ngeban, ngelangkar enggau ngaga bot laju.

Peranak asal ari Rumah Saong Tatai Pantu di Oyan Tengah Mujung Kapit, endang ngembuan pengerindu begagaka bot laju pengudah meda enggi bala bakih iya.

“Udah aku meda enggi bakih aku, dia aku lalu nguji lalu meransang diri empu ngaga bot nya nitihka singkang bakih aku tadi.

LANDIK…Mungo Jelani benung ngelangkar bot laju.

“Laban bai ati ti liat sereta bisi pengerindu, pengawa aku ngaga bot laju tu mujur nyentuk sehari tu agi dikerengkun aku,” ku Mungo.

Ku Mungo, pengawa ngaga bot laju tu mih pengawa dikemeran iya laban nadai kereja tetap.

Taja pia, pengawa tu udah ngasuh nama iya dikelala mensia mayuh kelebih agi sida ti rinduka pengalus enggau pemanah bot laju digaga iya.

Mungo madah, kereban diguna ngaga bot laju tu numbas iya pemayuh ga laban begunaka timpuh lama nembuka sebuat bot laju tu.

Suara Sarawak