KUCHING: Sarawak andalka semua hak ti dirintai ba Sepekat Malaysia 1963 (MA63) dipulaika ngagai menua ba taun 2023.

Premier Sarawak Datuk Patinggi Tan Sri Abang Johari Tun Openg madah, pekara nya dikeandalka iya serimbai enggau 60 taun penumbuh Malaysia ditanggam nengah sempekat nya.

“Kelimpah ari nya, perintah Gempung Parti Sarawak (GPS) deka terus ransing ati ngemansangka nengeri tu kelebih agi ba pekara infrastruktur pemun.

SAMA BERAMI… Abang Johari (dua kanan) datai ba Pengawa Ngintu Taun Baru 2023 di Stadium Perpaduan Kuching ditu, malam tadi.

“Nya alai, kitai ngarapka hak dibaruh MA63 deka terus dipulaika ngagai Sarawak maya kitai ngulihka ‘kemerdekaan’ 60 taun,” ku iya.

Abang Johari bejaku munyi nya rambau Pengawa Ngintu Taun Baru 2023 di Stadium Perpaduan Kuching ditu, malam tadi.

Ku iya, ba taun 2023 Perintah Sarawak ngembuan mayuh perambu ungkup menua tu nyapai siti jeman nyadi sebuah wilayah baka ti dirintaika maya numbuhka Malaysia.

Suara Sarawak