KUCHING: Pekit Kumang enggau Mantar Gawai HRELV 2023 Renggat Kedua deka diatur baru nyerumba pengerami Gawai Dayak taun tu.

Nitihka penerang ari HRELV Studio, pekit tu dibuka ngagai semua raban indu dara Iban ke agi rumpas beumur 17 nyentuk 29 taun.

Pia mega, pekit tu deka diatur kena 22 April tu ba Dinner World Restaurant, Bintulu.

NYAGUKA MAIN ASAL… Dara bajik ke agi rumpas ti deka nguji mandangka pemajik diri enggau ngangkatka pemanah pesaka bansa Iban diperansang masuk pekit nya.

Tuju pekit tu diatur dikena mandangka ngepan enggau keresa pesaka Iban ngagai rebak baru ngambika terus dikelala sereta dikerindu nitihka pemansang dunya.

“Ari pengawa baka tu mih kitai ulih bekunsika penemu pasal ngepan nitih ke penatai menua diri laban sekeda ari ngepan Iban endang dikelala nitihka menua.

“Ambika chunto, keresa ngepan asal ari pelilih Kemena kebendar iya enda sebaka enggau ngepan asal tunga ke Kapit.

“Beduduk ari nya, mayuh rebak baru bedau tentu mereti silik baka ni penerang enggau penyelai keresa ngepan asal ari sesebengkah menua,” ku penerang nya.

Ungkup penemu, pengawa rejister masuk pekit dibuka berengkah 10 Januari nyentuk 10 March 2023.

Entara perais ke nganti bala pemenang pekit tu iya nya gelar Kumang deka nerima mata duit sepenyampau RM3,000 disempulang jumpang, selampai, trofi, sugu tinggi enggau produk pemajik gamal.

Udah nya, pemenang gelar Lulong enggau Selinggar Matahari deka nerima perais mata duit RM2,000 enggau RM1,000 sereta disempulang jumpang, selampai, sugu tinggi enggau produk pemajik gamal.

Nangkan ke nya, pemenang ke bulih lumur empat enggau lima mega diberi perais sepenyampau RM500 disempulang selampai enggau produk pemajik gamal.

“Perais ti disediaka HRELV Studio taun tu chukup besai ari segi mata duit, produk pemajik gamal enggau pakej kemisi pengelama tiga hari dua malam.

“Arapka bala indu dara ke agi rumpas ti deka nguji mandangka pemajik diri enggau ngangkatka pemanah pesaka bansa Iban anang ngelepaska peluang tu. Rejister masuk pekit tu nadai bebayar,” ku tandu penerang nya.

Nitihka penerang mega, program Pekit Kumang enggau Mantar Gawai HRELV taun tu betuaika pemungkal raban HRELV empu iya nya Victor Imung.

Barang sapa indu dara ti bisi ati deka masuk pekit tu ulih rejister nengah chara online nuju lumur 019-8386032 tauka scan QR kod ba laman web : http://wa.link/6shli3.

Suara Sarawak