KENANG… Anwar (tengah) disempulang Abang Johari (dua kiba), Hajiji (kiba), Fadillah (dua kanan) enggau pengari ari Sabah begambar ungkup kenang pengudah baum ditu tadi. GAMBAR JAPEN

KUCHING: Sekretari Pekara Wang Nengeri, Datuk Sri Dr. Wan Lizozman Wan Omar dipadu nyadi kaban Kaunsil Asil Dalam Menua (LHDN) berengkah kemari (20 Januari 2023), ngarika Sarawak.

Menteri Besai Datuk Seri Anwar Ibrahim madah, pengawa nyiri nya diputus pengudah iya beratika profesional enggau peneleba Sekretari Pekara Wang Nengeri Sarawak nya.

“LHDN nyadi sebuah ejensi pemadu beguna, lalu aku beratika pengawa nyirika tu nadai meri penanggul tauka nyadi isu.

“Peminta profesional enggau penelaba ditanggup iya, aku tepantup ati meda perambu dibantai Perintah Nengeri Sarawak, iya bisi integriti, LHDN chukup begunaka orang baka tu,” ku iya.

Anwar bejaku munyi nya rambau aum pemberita pengudah ngetuaika Aum Matau Pejalai Randau Sempekat Malaysia 1963 (MA63) di Dun Sarawak ditu tadi.

Sebedau tu, Sarawak andalka pengawa Kabinet Perintah Besai baka ti dirintai ba Ripot Komiti Entara Perintah (IGC) 1962, Sarawak mesti bisi pengari ba LHDN.

Nya alai, perambu nyiri kaban ba Kaunsil LHDN nya entara pekara ti dipinta Perintah Sarawak nengah MA63.

 

Suara Sarawak