KAPIT: Siku apai tuai dipelaba lemas pengudah lenyau lebuh ngemudika perau panjai ba Nanga Belawai, Batang Rajang ditu, kena malam Hari Empat.

Pengerai Palan Bejalaika Operasyen Bomba Sarawak ba sebengkah penerang madah, Balai Bomba enggau Penyah Penusah (BBP) Kapit nerima kangau bekaul penusah urung pukul 8.40 malam.

Berindik ari nya, tiga raban betuaika PBK II Abu Seman ngena sebuah entukar 4WD berumban ngesah ngagai endur penusah nyadi ngambi berandau enggau nanya silik ngagai orang sebilik enggau tudah ba baruh Jematan Sungai Yong, Kapit.

Lugom Bengang

“Apai tuai ti lenyau nya benama Lugom Bengang beumur 73 taun lalu endur kebendar iya dipelaba lenyau ba nanga Sungai Belawai, seberai Batang Rajang ti semina ngena perau ngelayang ke seberai,” terang iya.

Raban bomba udah bejalaika ‘size up’ pasal penerang tudah ti lenyau lalu berandau enggau sida sebilik ke alai pengawa ngiga enggau nyelamat (SAR) enda ulih dipejalai ungkup pengelikun laban hari udah malam diumbaka ujan bangat dia.

Udah nya raban bomba minta sida ngaga ripot polis lalu operasyen SAR dipun pagi tu tadi.

NGENUKU PENERANG… Raban bomba berandau enggau orang sebilik enggau tudah ti lenyau ba baruh Jematan Sungai Yong malam tadi.

“Nitihka penerang ari sida sebilik, urung pukul 7.55 malam (Hari Empat), tudah benung ngemudi perau panjai ari Sungai Yong ngelawa Sungai Belawai ti ngelayang Batang Rajang.

“Diripotka mega, gaya hari benung ujan bangat diumbaka pangka nyitar,” terang iya.

Ku saksi ba menua nya, lebuh tudah datai ba nanga Sungai Belawai, enda Mukai-mukai iya nadai agi dipeda dalam perau.

Saksi semina bisi meda perau benung bepeling ba nanga sungai enggau injin sepit agi idup, ku iya nerang baru.

Suara Sarawak