KUCHING: Menteri BesaiDatuk Seri Anwar Ibrahim meri sukung penuh ngagai Sarawak negutka kaul enggau kerejasama menua sesepiak kelebih agi Indonesia enggau Brunei Darussalam.

Iya madahka Sarawak entara wilayah pemadu gah ba Malaysia lalu pekara nya enda ulih dikeenggai lebuh nama Tanah Kenyalang nyadi batang kenang ba randau iya enggau Presiden Indonesia, Joko Widodo enggau Sultan Brunei, Sultan Hassanal Bolkiah.

“Ba randau betunga mua enggau Jokowi, iya bisi nyebut penegap Sarawak ari sukut beranakka puku ngagai Indonesia nyengkaum ba indu mengeri baru sida, Nusantara.

NEMUAI SERAYA GAWA… Anwar diapit Abang Johari (kiba) enggau Fadillah lebuh ngulu pengerami makai lemai ba BCCK, malam tadi. – GAMBAR UKAS

“Pia mega randau enggau Sultan Brunei, kelimpah deka nambahka kerejasama enggau Malaysia kelebih agi ba sukut beranakka puku enggau dagang, bisi disebut pemesai guna nanggam kaul entara Brunei enggau Sarawak,” ku iya.

Anwar mantaika sukung iya nya lebuh bejaku ba Pengerami Makai Lemai Nengeri ba Palan Aum Besai Borneo Kuching (BCCK) ditu, malam tadi.

Sama datai Sapit Menteri Besai Datuk Seri Fadillah Yusof, Premier Sarawak Datuk Patinggi Tan Sri Abang Johari Tun Openg enggau Sapit Premier Datuk Amar Douglas Uggah Embas dsereta Speaker Kunsil Nengeri (Dun) Datuk Amar Mohd Asfia Awang Nassar.

Suara Sarawak