KUCHING: Perintah Sarawak deka nirika sebuah muzium baru baka Muzium Budaya Borneo ba Bintulu ti disadang tembu tiga taun.

Premier Sarawak Datuk Patinggi Abang Johari Tun Openg madah, tuju pengawa nya laban Bagi Menua Bintulu bisi sejarah kediri empu kelebih agi ngaul turai politik Sarawak.

“Kitai deka sebuah muzium baka Muzium Budaya Borneo didiri ba Bintulu laban bagi menua tu nurai demokrasyen keterubah ba Sarawak lalu Kunsil Nengeri (Dun) keterubah enggau aum keterubah Dun Sarawak mega diatur dia.

“Nya alai aku ngarapka muzium ti deka mandangka sejarah Bintulu tu ulih tembu dalam timpuh tiga taun,” ku iya lebuh bejaku serimbai pengawa bejadika Restoran Muzium Budaya Borneo ditu, malam tadi.

Abang Johari madah, muzium nya deka didiri nyadi versyen ti mit agi ari Muzium Budaya Borneo tang nadai madah berapa ungkus nirika muzium nya.

Suara Sarawak