KUCHING: Tanah puang diungkupka pekara pelajar enggau pengerai ba nengeri ti diserah ngagai Perintah Besai ngena belanja ti murah ba taun 1970-an enggau 1980-an deka dipulaika baru enti sema tanah nya dituku enda dikena.

Menteri Besai Datuk Seri Anwar Ibrahim madah, taja asal tanah nya diserah nengeri ngagai Perintah Besai ungkup pengelantang rayat tang projek pemansang enda ulih dipejalai dia engka ketegal enda engkeman tauka nadai agih belanja.

“Atur tu mega dikena ba selampur Malaysia ukai semina ba Sabah enggau Sarawak taja Premier Sarawak (Datuk Patinggi Tan Sri Abang Johari Tun Openg) bejakuka pekara tu, tang aku berundingka pemaik ngagai semua.

NERANG… Anwar (tengah) disempulang Abang Johari (dua kiba), Fadillah (dua kanan), Hajiji (kiba) enggau bala bukai rambau aum pemberita pengudah ngetuaika Aum Matau Pejalai Randau MA63 ba Dun Sarawak ditu tadi.

“Ambika chunto, tanah dipinta ba taun 80-an, dikemendar ba taun 1981, diatu udah taun 2022 lalu nadai projek dipejalai dia, semina bisi perambu besai aja,” ku iya.

Anwar bejaku munyi nya rambau aum pemberita pengudah ngetuaika Aum Matau Pejalai Randau Sempekat Malaysia 1963 (MA63) ba Dun Sarawak ditu tadi.
Berindik ari pekara nya, iya meri timpuh tiga bulan dikena nentuka bisi tauka nadai projek baka nirika begunan sekula dipejalai ba taba nya.

“Enti amat nadai sekula didiri dia tauka nadai agih belanja, tanah nya deka dipulaika baru ngagai nengeri ngena rega asal.

“Pekara tu deka diatur Sapit Menteri Besai Datuk Seri Fadillah Yusof ti deka meri ripot pekara tu ngagai aku, Premier Sarawak enggau Kepala Menteri Sabah,” terang iya.

Suara Sarawak