KENANG NEMUAI… Dr Sean Seah (dua kanan) nyuaka tepa ngagai Abang Johari, rambau penemuai basa raban SDEC kia kemari.

KUCHING: Premier Sarawak Datuk Patinggi Tan Sri Abang Johari Tun Openg nerima penemuai basa ari Kaunsil Digital Ekonomi Sarawak (SDEC) ba opis iya Wisma Bapa Malaysia, kemari.

Tuju penemuai raban betuaika Chairman SDEC Tan Sri Datuk Amar Mohamad Morshidi Abdul Ghani nya meri penerang lalu ngangauka Premier Sarawak ngelancharka Kongres Inovasyen enggau Teknologi Dunia ke-27 (WCIT2023) ti deka diatur ba Palan Aum Besai Borneo Kuching (BCCK) berengkah 4 nyentuk 6 Oktober 2023.

SDEC ba sebengkah penerang kemari madah, kongres berambaika jaku ‘Memenuhi Janji Era Digital’ tauka ‘Nangkup Peminta Jeman Digital’ nya nyelinting Inovasyen enggau Teknologi Nyungkak Pengelantang Ekonomi, Mungkur Pekara Rama enggau Rampa Rama Meruan.

Nya mega deka mungkur randau ti bejuraika empas pemansang teknologi ba pejalai undang-undang, politik enggau ekonomi ti marit pejalai dagang teknologi pemadah, jurai mutarka inovatif ari teknologi baru ditempa, baru enggau pemadu, sereta aum B2B enggau G2G.

“Tu dikena ngelala enggau nyamin peluang beranakka puku baru ungkup mayuh bengkah pengawa industri besai ari pengawa nyaga pengerai, perengka pengangkut enggau logistik, ngetanka menua, minyak enggau gas ngagai sektor wang,” terang iya.

Sebedau tu, SDEC ngarika Perintah Sarawak udah menang ba undi ngatur WCIT taun tu kena 15 September 2022 rambau WCIT2022 ba Pulau Pinang lalu nerima sukung penuh ari komiti WITSA.

WCIT2023 deka mai bala tuai dunya, penengkebang politi, orang akademik enggau komuniti digital ari sains, teknologi enggau pekara mensia begempuru ngambi berandauka pemar enggau chara ti bisi diatur bekaul jeman digital ba rantau Borneo.

Kelimpah ari nya, atur program pengelama tiga hari nya deka mai lebih 2500 diligit, 80 menua enggau 200 pengelicha ari industri, bala tuai perintah enggau orang akademik.

Sama nyempulang penemuai basa nya Chairman World Innovation, Technology and Services Alliance (WITSA), Dr Sean Seah, Tuai Pegawai Eksekutif (CEO) WITSA, Datuk Dan E Khoo, Chairman PIKOM, Ong Chin Seong enggau Tuai Pegawai Eksekutif PIKOM Ong Kian Yew.

Suara Sarawak