22 Julai 1963 : Kabinet keterubah Sarawak

Lebuh kitai gagit ngintu Hari Sarawak 22 Julai, aram kitai bela berati baru sapa bagi ketuai politik Sarawakian ke udah bebendar negika menua Sarawak nyentuk ulih merintah diri.

Mulaika kenang kena 21 Julai 1963 bekau ari mandat diberi Perintah Koloni British Borneo dia Kepala Menteri keterubah Sarawak udah dipilih iya nya Tan Sri Datuk Amar Stephen Kalong Ningkan.Pia mega, kaban kabinet ke bukai iya nya Tun Abdul Taib Mahmud, James Wong Kim Ming, Dunstan Endawie Enchana, Awang Hipni Pengiran Anu enggau Teo Kui Seng.

Pemujur numbuhka kabinet Sarawak ti keterubah tu nyadi siti sejarah besai ngagai menua kitai Sarawak laban udah nyingkang ngagai jeman baru lepau ari perintah Koloni British.

Dulu ari nya, dikena meri kelala ngagai sistem demokrasi ngagai rayat Sarawak, dia pemerati ari Perintah Koloni British ba taun 1962 bisi ngatur pengawa bepilih besai di Sarawak. Beberapa parti politik bisi bediri minta pilih nyengkaum parti SNAP, SUPP enggau PESAKA.

Ba pengawa bepilih nya, parti SNAP menang besai nengah iring Stephen Kalong Ningkan. Nya alai, kena 22 Julai 1963, piak Koloni British ngamatka peminta rayat Sarawak. Bekau ari penyadi sejarah nya mega, Gabenor British di Sarawak iya nya Sir Alexander Waddel ngarika perintah Koloni British nurunka menira British di bumi Kenyalang lalu ngemataka menira Sarawak empu ditiki ba Kuching.

Niang Tan Sri Datuk Amar Stephen Kalong Ningkan

Lepas penumbuh kabinet nya, dia Tan Sri Datuk Stephen Kalong Ningkan ngaga mosyen ba Supreme Kaunsil Sarawak ngerah sebuah gagasan ke diberi nama Gagasan Malaysia ke ditempa ari empat buah menua iya nya Menua Persekutuan Tanah Melayu (Malaya), Menua North Borneo (Sabah), Menua Sarawak enggau Menua Singapore.

Mosyen tu nerima sukung penuh ari kaban Supreme Kaunsil Sarawak. Dalam kandang 54 hari udah nya, Stephen Kalong Ningkan begulai enggau Tuai Pemegai Menua (TYT) Sarawak ke baru Tun Abang Haji Openg Abang Sapiee sereta pengari ari Persekutuan Tanah Melayu, Khir Johari ngerah penumbuh menua Malaysia ba Padang Merdeka, Kuching kena 16 September 1963.

Kepala Menteri keterubah

Tan Sri Datuk Amar Stephen Kalong Ningkan nyadi Kepala Menteri Sarawak ti keterubah berengkah ari 22 Julai 1963 nyentuk September 1966.

Iya asal ari menua Betong, penakan Iban China lalu landik mega bejaku China. Iya ngepunka pelajar ba Sekula Primari St Augustine lalu gawa nyadi Pengerikod Penatai ba Sepital Serikat Shell di Kuala Belait, Brunei dalam beberapa taun.

Kabinet keterubah Sarawak 22 Julai 1963. Gambar Facebook

Iya endang dikelala siku orang ke bepenau nyadi ketuai maya dipadu nyadi Chairman Kelab Dayak Shella lebuh ke agi gawa din. Kelimpah ari nya, iya siku orang ti nyadi pemungkal sereta Chairman Gerempung Dayak Sarawak ari taun 1958 nyentuk 1960.

Ngelansa sejarah politik niang Stephen Kalong, iya numbuhka Parti Bansa Sarawak (SNAP) kena 10 April 1961 di Betong. Maya nya iya dipadu nyadi Sekretari Besai. Raban bukai ke bela nyereta pengawa numbuhka SNAP iya nya T.S Tinker (Chairman), Edward Howell, Edwin Howell, Ivory Kedit, Mathew Dana Ujai, David Lawrence Usit, Nyipa Julin enggau Lionel Bediman anak Ketit.

Penyarut politik

Bepelasarka sejarah mega, penyarut politik Bumi Kenyalang majak nyadi kenyau 1963. Pekara tu bisi kaul enggau pengawa Lee Kuan Yew ari Singapura ti nguji beserakup enggau Sabah sereta Sarawak. Tu ngujungka kena 9 Ogos 1965 Singapura kena tendang ari Malaysia dikena ngurangka majoriti bansa China di Malaysia.

Bemacham cherita sejarah politik Sarawak, udah didinga lalu kitai bela nemu sekalika ari kereban bacha tauka tusi sida ketuai ti endang landik ba pekara politik. Pengelabuh niang Stephen Kalong ari dunya politik endang bepun ari penyarut ketegal kuasa. Enti enda ketegal penyarut kada enda agi kitai Dayak nyadi Kepala Menteri?

Nya alai pengujung iya kena 14 September 1966 Yang di-Pertuan Agong, Malaysia ngerah darurat di Sarawak ungkup pengelikun enggau pengelantan nengeri. Udah nya, Datuk Penghulu, Tawi Sli ari Simanggang, siku ex- paderi ke mega siku pengajar dipadu nyadi Kepala Menteri Sarawak dikena nyelamatka Sarawak ari penyarut politik.

Penyarut politik endang nadai pulaika penguntung laban pangka ari laya ti nyadi baka ke diperati ari sejarah ukai semina ngujungka kitai lenyau kuasa tang mega kurang dibasa sereta balat nyalahka pangan diri. Nya alai jaga mih penyerakup ke udah bisi di Sarawak ngambika menua tu terus likun sereta lantang.

Suara Sarawak