22,000 MS khas dichelak dawat emas

KUCHING: Beserimbai enggau Genap Taun Ke-150 Setim Sarawak, Pos Malaysia Berhad (Pos Malaysia) nyelak 22,000 setim mit (MS) ngena dawat emas ba ripin setim pemadu baru di Malaysia.

Ketuai Setim enggau Unit Filateli Pos Malaysia Haidan Abd Rahman madahka setim pemadu baru berengkah dijual berebak 18 Julai ba semua pos opis selampur Malaysia.

“MS sekali tu dijual berega RM5.00 mandangka mayuh gambar setim Sarawak kelia ti dichelak engna dawat emas.

“Ba hari keterubah Pos Malaysia deka nyual 17,000 iti karung surat khas berega RM0.50 siti di serata menua kitai,” ku iya nerang.

MULAIKA PENGINGAT… Siku indu ari Pos Malaysia pampang Kuching nunjukka setim sereta karung surat ti deka dijual.

Haidan mansutka jaku nya ba aum pemberita di Balai James Wong Kim Min Sekula Sekondari (SMK) St. Thomas ditu pagi kemari.

Kelimpah ari nya ku iya, Gerempung Filateli Kuching Sarawak (PSKS) bekerjasama enggau Kelab Setim & Filateli (Kesef) SMK St. Thomas deka ngatur pengawa mandangka setim kena 18 enggau 19 Julai tu ba Balai James Wong Kim Min SMK St. Thomas berengkah ari 9.00 pagi nyentuk 4.00 lemai.

“Beserimbai enggau pengawa tu, kami deka ngaga chap khas ngembuan hari bulan ungkup dua hari nya aja.

“Setim ti ditengkebang enggau dichelak di New Zealand dikearap ulih nerenak ulah angkun ngagai rebak baru kelebih agi ba seni ngumpul setim,” ku iya.

Aktiviti ngumpul setim tu mega sebagi ari chara mensia mayuh ngerapitka tanggam kaul nengah konvokesyen setim entarabansa sereta pos silang nyadika pelasar sida betukar setim di dunya.

“Setim mega ulih ngajar kitai pasal pekara seni bina tauka seni berumah, pesaka asal, sains enggau teknologi ti dikena ba perengka pengangkut kelia.

“Setim nyadika pengingat ti kala dijual Pos Malaysia iya nya Setim Keterubah Sarawak (1869), ‘Seabad’ Perintah Brooke (1946), ‘Pembentukan’ Malaysia (1963) enggau Genap Taun Ke-150 Dun Sarawak,” ku iya nampung.

Ngelansa sentang Gerempung Filateli ku Haidan, gerempung tu datai ari sida ti angkunka pengawa ngumpul utai di dikirum.

Presiden PSKS Dr Ong Liap Teck mega madahka diri berasai lantang ati laban Pos Malaysia udah ngangkatka 150 Taun Setim Sarawak nyadi sebagi ari ‘sejarah’ menua.

Sama datai Prinsipal SMK St. Thomas Pengajar Robin Sabai.