23 iku volunteer udah setuju dituchuk vaksin

KUCHING: Raban gawa diluan di nengeri tu deka berengkah nerima vaksin Covid-19 ujung bulan tu.
Direktor Opis Pengerai Nengeri Sarawak (JKNS) Dr Chin Zin Hing madahka program imunisasyen Covid-19 mega deka berengkah dipejalai ba menua tu.

Ngelansa pasal program beperesa klinikal vaksin Covid-19, Zin Hing madahka naka tu, bisi 23 iku volunteer udah setuju dituchuk vaksin.

“Dua iku ari sida nya udah dituchuk vaksin kena Hari Tiga tu tadi lalu pengawa nya agi ditampung.

“Sida ti udah rejister nama deka dikangau lalu enti sida udah setuju, sida deka diberi taga enggau jam datai betuchuk vaksin,” terang iya.

Zin Hing mansutka jaku nya ba aum pemberita Covid-19 di Begunan Dun Lama, ditu ensanus.

Ku iya, volunteer nya mesti beperesa enggau dipatau pengelama 13 bulan pengudah dituchuk vaksin.

Zin Hing madahka ukai semua volunteer ti beperesa klinikal vaksin Covid-19 deka dituchuk vaksin nya.

“50 peratus ari sida deka nerima dtuchuk vaksin seraya 50 peratus agi deka dituchuk plasebo.

“Kebuah pia laban kitai deka meda pengasi enggau pengetan tubuh bala volunteer pengudah dituchuk vaksin,” terang iya.

Zin Hing mega madahka bisi semilan palan ba selampur menua nyadi palan peresa klinikal Covid-19 nyengkaum Sepital Besai Sarawak (SGH).

Dulu ari nya, Menteri Besai Tan Sri Muhyiddin Yassin madahka perintah deka bejalaika Program Imunisasyen Covid-19 Nasional berengkah ujung bulan tu.

Ku Muhyiddin, 80 peratus rayat ba menua tauka 26.5 juta iku deka nerima vaksin pechuma ti deka dipejalai ba tiga renggat.