RWMF 2019
KUCHING: Kaunsil Dagang Temuai Sarawak (STB) nagit penyampau RM47 juta enggau 24,000 temuai dalam program Rainforest World Music Festival 2019 (RWMF) sepanjai tiga hari berunggu.
Pemangku Ketuai Pemesai Eksekutif (CEO) STB Angelina Bateman madahka tagit RM47 juta tu disadang datai ari penyampau tubuh bala temuai ngusung palan ngatur pengerami berengkah ari 12 ngagai 14 Julai.
“Taun nyin tadi kami mujur bulih RM42 juta lalu taun tu kami nagit nyampau agi, enti ulih nambah manggai RM47 juta.
“Lalu bisi lapan menua ti keterubah iya nyereta pengerami tu baka Nagaland, Bhutan, Canary Island, Mauritius, Dayak Kalimantan Barat, Jamaica, Estonia enggau Ainu Culture ari Jepun,” ku Angelina nerang.
Iya mansutka jaku nya lebuh meri penerang pandak ngagai pemberita di Resort Pantai Damai, ensanus.
Ku Angelina nambah, semina 300 temuai aja rambau pengerami tu terubah diatur taun 1998 lalu diatu udah nambah ngagai 20,000.
“Batang tuju pengerami tu dikena ngelakuka palan ditapatka temuai kelebih agi di Sarawak ngagai renggat entarabansa.
“Tu mega dikena mansutka belanja enggau meri penguntung ngagai bala pedagang seraya mandang enggau ngintu main asal dikemisi Sarawak,” ku iya madah nyemetak.
Sama datai raban media ari menua tu enggau menua luar nyengkaum Australia, Indonesia enggau India sereta menua bukai.
