KUCHING: Sarawak sehari tu ngerikodka 2,464 kes baru positif Covid-19 lalu nya ngujungka penyampau kes positif Covid-19 di menua tu nambah ngagai 124,428 kes.
Komiti Penyangga Penusah Nengeri (JPBN) Sarawak, madah pelilih Kuching agi ngerikodka kes positif pemadu tinggi iya nya 696 kes, ditangkanka Sibu (309), Serian (229), Samarahan (168), Subis (155), Lundu (142), Bau (120), Sri Aman (112), Bintulu (104) enggau ke bukai.
Nangkan ke nya, bisi tujuh kes pemati baru ketegal Covid-19 dirikodka.
Kes pemati baru tu ngaul enam iku lelaki enggau siku indu beumur 45 ngagai 90 taun.
Sida ti midang tu mega dirikodka ba Sepital Besai Sarawak (HUS) iya nya empat kes, Sepital Serian (siti kes), Sepital Sri Aman (siti kes) enggau Sepital Bintulu (siti kes).
Penerang tu mega madahka bisi tiga kluster baru dirikodka kemari iya nya Kluster Sawit Gelasah Subis, Kluster Nanga Tapih Betong enggau Kluster Jalan Masuri Sibu.
Dua iti kluster nya ngaul palan gawa ke alai siti kluster ngaul komuniti.
Kelimpah ari nya, Kluster Bedup Longgo Serian enggau Kluster Jalan Merbau Kuching ditukuka punas.
