25 April: Sarawak ngerikod 10 kes baru Covid-19

KUCHING: Sarawak ngerikod 10 kes baru positif Covid 19 kemari ngujungka bisi 478 kes kenyau ari kes keterubah kena 18 March tu tadi.

Nitihka penerang ari Komiti Penyangga Penusah Ngenyit Nengeri (JPBN), ari 10 kes nya enam ari Kuching, Samarahan (tiga kes) enggau siti kes ari Miri.

“Pia mega, kemari ngerikod dua kes udah suman nya ari Kuching enggau udah pansut ari sepital ngujungka bisi 150 kes dirikodka udah suman.

“Nambahka nya, bisi 135 kes Pesakit Agi Dipatau (PUI) dibanding 147 dirikodka sebedau tu enggau 550 kes PUI agi nganti pemutus makmal,” ku penerang nya tadi.

Urung 20 iku ti positif nya sebagi ari kluster Gempuru Besai Gerija lalu 30 iku nya bekaul kluster mit.

Bisi tujuh kluster udah ditemu iya nya kluster Gempuru Besai Gerija Kuching ngerikod kes pemadu tinggi iya nya 163 kes ditangkan kluster Sri Petaling (103), PUI Itali (61), kluster mit (99), Sporadik kes (29) lalu 23 kes agi dipansik enggau kes baru.

Kemari, bisi 292 Pesakit Dipelaba Kena Rampit (PUS) baru udah rejister nama ba hotel ngujungka 1,451 iku udah dikurung ba 19 buah hotel di selampur Sarawak.

Nambahka nya, bisi 717 iku udah ngurung diri nitihka timpuh ditetapka enggau dikemendar pulai ke rumah diri.

Suara Sarawak