2,657 pengajar deka dipatih ngajar ngena Jaku English

KUCHING: Sepenyampau 2,657 pengajar deka dipatih ngajar Subjek Sains enggau Matematik ngena Jaku English datai ba taun 2020.

Menteri Pelajar, Sains enggau Pansik Teknologi Datuk Sri Michael Manyin Jawong madah, pengawa matih bala pengajar tu deka dirumban opis menteri nya.

“Bisi 1,005 pengajar deka dipatih ngajar Subjek Sains enggau 1,275 ngajar Subjek Matematik ngena Jaku English.

“Seraya 377 pengajar deka dipatih ngajar Jaku English ba kededua subjek lalu kesemua penyampau tubuh sida tu bisi 2,657,” ku Manyin nerang.

Iya mansutka penerang rambau aum pengarang berita di Begunan Baitulmakmur ditu, kemari.

Pia mega ku Manyin, enam taun nangkan nya, sida deka matih 7,508 pengajar ngajar subjek ngena Jaku English.

“Ari penyampau sida nya, 2,823 dipatih ngajar Subjek Sains enggau 3,978 ngajar Subjek Matematik ngena Jaku English.

“Seraya 707 iku deka dipatih ngajar kededua subjek ngena Jaku English,” ku iya nandu.

Kelimpah ari nya, modul matih pengajar tu deka diubah mimit ari modul asal lalu sida mega deka mendingka penemu bala pengajar, ku Manyin nampung.

Manyin madahka pengawa matih pengajar Subjek Sains enggau Matematik ngajar ngena Jaku English tu begunaka belanja manggai RM9 juta.

Suara Sarawak