27 agi tiang pemanchar telekomunikasyen deka digaga di Puncak Borneo

KUCHING: Mensia mayuh di Parlimen Puncak Borneo deka ngasaika pemansang arus penyambung alai 27 agi tiang pemanchar telekomunikasyen 4G deka digaga ba sitak nya.
Sapit Menteri Bekebun Dandang Besai enggau Komiditi Malaysia, Willie Mongin madah, projek nya digaga nengah program Jalinan Digital Negara (Jendela) ke diatu benung ditender Suruhanjaya Komunikasi dan Multimedia Malaysia (SKMM).
“Naka tu Parlimen Puncak Borneo udah bisi 75 tiang pemancar komunikasyen kelimpah Opis Multimedia Sarawak (SMA) diatu mega benung sereta udah ngaga 16 legit komunikasyen ditu,” pia ku iya madah, kemari.
Iya ti mega Kaban Parlimen Puncak Borneo madah, diatu mega peranak Kampung Bunuk enggau genturung pendiau ke besemak udah ngasaika pemansang telekomunikasyen 4G LTE.
“Bulan November taun siti nyin tadi aku kala besemaya ngemanahka agi arus penyambung tauka telekomunikasyen di Kampung Bunuk.
“Diatu sida semenua nyengkaum mensia mayuh ke ngelinggi pendiau dalam kandang dua kilometer deka ngasaika servis on-line ke manah agi,” ku iya.
Nambahka jaku iya, Willie madah, penembu 43 tiang pemanchar telekomunikasyen ila deka nentuka 98 peratus peranak menua di Puncak Borneo deka bulih servis telekomunikasyen ke manah.
“Aku naka alah nentuka rayat ditu ngasaika pemansang ke chukup sereta meruan nyengkaum ba arus penyambung.
“Pia mega kitai meri besai terima kasih ngagai Menteri Komunikaysen enggau Multimedia Datuk Saifuddin Abdullah ti udah mayuh nyaup kitai di Parlimen Puncak Borneo,” pia ku iya.