MIRI: Perintah Sarawak udah nyuaka 270 Surat Pala Tanah di baruh Seksyen 18 Kanun Tanah Negeri (KTN) ngagai 183 penerima ba sitak Beraya, Miri.

Sapit Kepala Menteri Datuk Amar Awang Tengah Ali Hasan madah, ba taun 2017, sitak Beraya udah nerima pala tanah nengah Operasyen Penyelesaian Beraya Bab V KTN.

“Sitak tu udah digazet nengah G.N.No.4173 kena 21 Disember 2017 dipelaba pemesai 1,677.61 hektar.

“Nengah operasyen tu, bisi 717 surat pala tanah udah direjister ngagai komuniti Melayu/ Kedayan,” terang iya.

Awang Tengah mansutka jaku nya ba Pengawa Nyuaka Surat Pala Tanah di baruh Seksyen 18 Kanun Tanah Negeri (KTN), ditu sehari tu.

Awang Tengah madah, sepenyampau 447 surat pala tanah udah disua berenggat ba taun 2019 enggau 2020.

“Sehari tu (kemari), perintah deka nyuaka laluh surat pala tanah Seksyen 18 KTN nya ngagai tujuh iku penerima.

“Bisi 270 surat pala tanah deka disua ngagai 183 iku penerima pengudah pengawa tu ngambi nitihka Atur Pengawa Standard (SOP) dikena nagang Covid-19,” terang iya.

Awang Tengah ke mega Menteri Pemansang Mengeri enggau Pengeraja Asal Kedua madah, surat pala tanah di baruh Seksyen 18 nya bisi pengelebih baka pengempu tanah enda ibuh bayar premium, chukai tanah enggau gi bukai lalu sida nyadi pengempu tanah tetap.

“Perintah Sarawak semampai ngaku enggau ngetanka hak rayat ba tanah NCR enti pekara nya sah nitihka atur undang-undang.

“Pengawa nyukat enggau mansutka surat pala tanah NCR udah dipejalai perintah kenyau ari taun 1960-an nyentuk taun 2010 nengah bemacham program baka Operasi Penyelesaian, Pengawa Nyukat Begian III KTN enggau ke bukai,” terang iya.

Ungkup rikod, Awang Tengah madah ba timpuh 50 taun nya (1960-2010), pengawa nyukat chara lama tu ulih nyukat mimit aja tanah pemesai urung 260,000 hektar (642,460 ikar) tanah NCR ke mujur disukat enggau pukul rata semina pemesai 5,200 hektar tanah NCR ulih disukat setaun.

“Pengeran perintah ngetanka hak rayat ba tanah NCR sida endang amat nitihka atur undang-undang.

“Nambahka nya, perintah mega udah ngerumban pengawa nyukat tanah NCR nentuka pengempu tanah NCR bisi dokumen ngempu, kelingi tanah ke nyengala enggau nadai diambi orang,” terang iya.

Nya kebuah ku Awang Tengah, perintah udah bejalaika Program Nyukat Tanah NCR Inisiatif Baru ba taun 2010 nengah dua renggat.

Ba renggat keterubah iya nya nyukat kelingi tanah enggau digazet di baruh Seksyen 6 KTN nyadi Rizab Komunal Bumiputera (Pertanian).

Nangkan nya, ba renggay kedua nya pengawa nyukat lot ngarika diri enggau mansutka surat pala tanah di baruh Seksyen 18 KTN deka dipejalai.

Ku iya, ari taun 2010 nyentuk diatu, Opis Tanah enggau Survei (JTS) Sarawak udah nyukat kelingi tanah pemesai urung 999,853 hektar (2.47juta ikar).

Ari penyampau nya ku Awang Tengah, bisi 776,226 hektar tauka 1.9 juta ikar udah digazet.

“Uji kita beratika penyauh bida pemansang pengawa nyukat nengah Program Nyukat Tanah NCR Inisiatif Baru (2010 nyentuk diatu) dibanding Program Nyukat Chara Lama (1960-2010).

Nya entara program nyukat tanah ke mujur dipejalai sereta beguna amat dikena nentuka kelingi tanah NCR ke nyengala sereta direjister dalam rejister tanah enggau Gazet Rizab Komunal Bumiputera di baruh Seksyen 6 Kanun Tanah Negeri dikeluarka,” terang iya baru.

Ba renggat kedua, perintah bejalaika pengawa nyukat lot ngatika diri nitihka peminta ti dikemendar, sitak nya udah disukat chara kelingi, digazet di baruh Seksyen 6 Kanun Tanah Negeri enggau pengempu tanah NCR sedia bejalaika pengawa nyukat tanah sida.

Dikena nentuka pengawa nyukat lot ngatika diri lanchar dipejalai, sida ke ngempu tanah NCR mesti meri kerejasama penuh ngagai JTS Sarawak.

“Sida mesti ngelala entara tanah lalu ngerintis tanah, nadai belayaka entara sereta sida ke ngempu tanah mesti nadai maya pengawa nyukat kelingi tanah dipejalai,” ku iya.

Naka tu, bisi 46,346 lot ngatika diri udah disukat mungkur tanah pemesai 55,970 hektar (138,305 ikar) ke udah enggau deka dipansutka surat pala tanah di baruh Seksyen 18 KTN.

“Aku udah ngasuh JTS Sarawak bejalaika Program Nyukat Tanah NCR Inisiatif Baru tu ngagai semua sitak enggau bagi menua di selampur Sarawak mungkur semua bumiputera ke bisi hak ba tanah asal sida,” terang Awang Tengah.

Sama datai Menteri Muda Orang Indu enggau Pemansang Anak Mit, Datuk Rosey Yunus, Menteri Muda Dagang Temuai, Seni enggau Main Asal, Datuk Sebastian Ting enggau bala temuai dipebasa ke bukai.