KUCHING: Pekit Besai Tenpin Boling Antarabansa 2023 deka diatur berengkah ari 4 nyentuk 9 September tu ba Megalanes Sarawak, Batu Kawa.
Pekit lima hari nya ngempung lebih 300 pemain ti ngarika 11 menua sereta nyendia perais mata duit ti besai sepenyampau RM160,000 ungkup empat kategori pekit nya.
Sapit Menteri Nembiak, Lumba enggau Pemansang Orang Dagang, Datuk Gerald Rentap Jabu madah, entara menua ti ngambi bagi ba pekit nya baka Poland, Singapore, Thailand, Taiwan, Filipina, Hong Kong, Indonesia, Vietnam, Brunei Darussalam, Australia enggau Malaysia ti nyadi tuai rumah endur ngatur pekit nya.
Iya madah, nya renggat kedua pekit tenpin boling antarabansa ti diatur Gerempung Tenpin Boling Amatur Sarawak (ABAS).
“Pekit sekali tu bela dipasuk pemain tenpin boling profesional ari Poland, Amerika Syarikat iya nya Daria Pajak ti ngatur klinik ungkup pemain biak,” ku iya.
Rentap mansutka jaku nya rambau aum pemberita Pekit Besai Tenpin Boling Antarabansa 2023 ti diatur ba Palan Akuatik Pandelela Rinong, Petra Jaya ditu, kemari.
Terang iya, pengawa ngatur pekit nya ulih ngangkatka industri dagang temuai lumba enggau ekonomi Sarawak.
Mandal Presiden ABAS, Robert Lu Nam Min madah, raban sida beterima kasih ngagai Opis Menteri Dagang Temuai, Industri Kreatif enggau Seni Pemerindang (MTCP) ketegal nyukung pengawa ngatur pekit nya.
“Bisi empat kategori dibuka ungkup pekit tu ila baka kategori tebuka, classified, senior (lelaki enggau indu) sereta nembiak (baruh 25, 18, 15 enggau 13),” ku iya nyemetak.
