305 iti KGC udah disadung

KUCHING: Bisi 305 iti Kad Emas Kenyalang (KGC) udah disadung Serakup Besai Komuniti China Bagi Menua Kuching, Samarahan enggau Serian ba Gala City, kemari.

Presiden gerempung nya, Datuk Richard Wee madahka, sida dipinta Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit nyadung kad ke udah dikeluarka.

“Bala penerima kad dikangau dulu datai ngagai palan nitih maya ti udah ditetapka.

“Sida datai kitu ngambi kad aja, tang enti bisi orang tuai ti bedau ngerejister datai, kitai ulih mantu sida ngisi pom nengah bantu Parti Sa’ati Rayat Sarawak (SUPP) Pampang Batu Lintang,” ku iya.

Iya bejaku munyi nya lebuh ditanya pemberita maya ngulu pengawa nyadung KGC di Gala City ditu, kemari.

Ku iya, bala penerima diasuh mai tingki lebuh deka ngambi kad.

“Sehari tu (kemari) kami muka palan ngambi kad ditu nyentuk pukul 12 tegah hari aja.

“Ngagai sida ti bedau ngambi kad seharitu (kemari), kami deka ngiga chara ngangau ke sida ngambi kad nya ba maya bukai,” ku iya.

Iya madahka, pengawa nyadung kad tu deka digaga enda ngetu nitihka gerah ari Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit.

“Nyadi sebuah gerempung, kami deka mantu perintah ngatur pengawa tu enggau naka ulih ungkup pemaik semua rayat,” ku iya.

Suara Sarawak