KUCHING: Urung 3,100 bantu piket pemakai disadung ngagai Tuai Bilik (KIR) di semua pating pampang N8 Satok ke udah berengkah kena Hari Enam nyentuk Hari Dua tu ila.
Bantu nuya berengkah disadung kemari ba empat pampang pating iya nya Pating Kudei Baru Iban, Pating Kampung No 4, Pating Masjid enggau Pating Masjid (Bintangor Kecil) ke mungkur 294 piket pemakai.
Pating Masjid nerima 80 piket pemakai ngambika disadung ngagai KIR ari 55 rumah di kandang Kampung Masjid. Udah nya Pating Masjid (Bintangor Kecil) nerima urung 55 piket pemakai.
Kenu ku Penghulu Kampung Masjid, Iskandar Landau, raban sida chukup beterima kasih ngagai Perintah Perintah lebih agi Kepala Menteri Sarawak, Datuk Patinggi Abang Abdul Rahman Johari Openg laban siru beratika nasip rayat napi Atur Mindah Betagang (PKP) ketegal pengerekai Covid-19.
“Tu mandnagka penyiru Perintah Nengeri betuaika Kepala Menteri ngagai rayat ke benung tusah ketegal PKP enggau pengerekai Covid-19.
“Enggau peluang tu aku meransang mensia mayuh lebih agi ba sitak N8 Satok terus nitihka SOP ke udah dipadah dikena nagang Covid-19 tu,” ku iya maya pengawa nyuaka bantu nya kemari.
Nangkan ke nya, Tuai Genturung Pendiau (KK) Abang Lahop Abang Tamrin ngarika Pating Masjid (Bintangor Kecil) bela meri terima kasih ngagai perintah lebih Kepala Menteri laban udah meri bantu ke endang diguna.
Berebak enggau nya, iya minta mensia mayuh ke bedau ngerejister diri nerima vaksinasyen patut ngerejister diri enggau lengkas awakka nyapai imuniti beraban.
Dulu ari nya, pengawa kelai nyuaka piket pemakai nya dikemujurka Sapit Tuai Pampang N8 Satok,Datuk Ibrahim Baki.
Sama bisi datai Sekretari Politik Kepala Menteri Sarawak, Abdul Samat Gany, Mandal Tuai Pampang N8 Satok Hilmy Othman enggau Tuai Nembiak N8 Satok Dzamaludin Zainuddin.
