314 graduet Swinburne S’wak nyulut

KUCHING: Sepenyampau 314 graduet dirami rambau Konvokesyen Universiti Teknologi Swinburne Kampus Sarawak nya.

Kepala Menteri Datuk Patinggi Abang Johari Tun Openg ti mega nyadi Pro Chansellor universiti nya udah dipebasa nyuaka skrol sereta bejadika pengerami.

Mandal Chansellor ke mega nyadi Presiden AO Swinburne Profesor Linda Kristjanson madahka pengawa pelajar beguna bendar kena nangkup peminta pemansang menua ti seruran berubah.

“Dalam siti komuniti bepelajar, mayuh orang ngaul diri dalam pengawa bepelasarka pelajar nyengkaum mayuh bengkah bidang enggau disiplin.

“Penyulut dalam pelajar enggau latih beguna bendar kelebih agi lebuh bala nembiak ngambi bagi dalam ekonomi entarabansa bepelasarka penemu ti meruan,” ku iya.

Linda madah munyi nya rambau Pengerami Konvokesyen Ke-20 Universiti Teknologi Swinburne Kampus Sarawak di Palan Aum Borneo Kuching (BCCK) ditu tadi.