KUCHING: Bisi 32 iku raban diselinting ti benung bepuasa dalam bulan Ramadan ba Kampung Paya Mebi diberi bantu barang pemakai.

Chairman Kaunsil Kandang Menua Padawan Lo Khere Chiang madahka pengawa meri bantu ti diatur Gerempung Golf Amatur Bumiputera Sarawak tu ngayanka pengelurus ati raban nya deka mantu orang ti begunaka.

“Taja gerempung tu diarika orang ti bisi penatai pemisi tang sida nadai ninggalka orang ti begunaka bantu.

“Pengelurus ati sida patut nyadi chunto orang bukai mantu raban seranta baka indai tunggal, anak patu balu, orang nyelai pendiau (OKU) enggau ke bukai,” ku iya.

Khere Chiang bejaku munyi nya rambau Program Nyuaka Bantu ari Gerempung Golf Amatur Bumiputera Sarawak ngagai peranak Kampung Paya Mebi di Masegit Al-Muhajirin ditu, kemari.

Berebak enggau nya, Adun Batu Kitang nya mega ngelalau rayat ba kandang menua nya ngambika nyaga pengerai diri dikena nyeliahka penyakit Covid-19.

“Anang enggai ngena sengkabung mua enggau suah nuchi jari laban nya aja chara dikena kitai nyaga diri.

“Lebuh pengerekai penyakit Covid-19 benung nyadi di Kampung Haji Baki ati aku balat irau.

“Dalam sepuluh hari nyau manggai 30 kes positif dirikodka, nya ngasuh ati aku balat tekenyit,” ku iya.

Iya madahka, semak 17 hari udah bejalaika atur bekurung baru kes Covid-19 di Kampung Haji Baki punas.

Dulu ari nya, Presiden Gerempung Golf Amatur Bumiputera Sarawak Irwan Zulkarnain Mohamad Hasbie madahka dalam bulan Ramadan tu sida udah meri bantu barang pemakai ngagai empat buah kampung iya nya Kampung Samariang Lama, Kampung Sungai Maong, Kampung Bukit Kudi, Pasir Pandak enggau Kampung Paya Mebi.

“Bisi sebuah agi kampung deka dibantu kami nangkan tu ila,” ku iya.

Ba program nya kemari mega sida bisi nyadung 400 bungkus bubur lambuk ngagai orang ti mansa masegit nya.