33 dikompaun di sebuah bistro ngelanggar SOP

KUCHING: Ulah enda nitihka Atur Pengawa Standard (SOP) nyaga takah enggau pangan diri ngujungka 33 iku dikompaun RM1,000 siku ba sebuah bistro enda jauh ari Jalai Song, malam tadi.

Ketuai Polis Pelilih Kuching ACP Awang Din Awang Gani madahka, semua sida nya ditemu enda nitihka SOP baru lebuh diperesa raban Opis Pansik Jenayah Kuching urung 11.30 malam.

Ku iya, atur terit nyengkaum ukum kompaun terus dipejalai laban agi bisi ti enda pedulika atur ti dikeluarka perintah.

“Asil pansik ngagai palan nya tetemuka pekereja enggau orang ti datai kia enda nitihka atur nyaga takah ke alai sida semua duduk dampih enggau pangan diri.

“Bisi 33 iku sida mungkur 20 iku lelaki enggau 13 iku indu dikompaun laban ngelanggar Peraturan 3, PPPPB (No. 7) 2020,” ku iya dalam siti penerang sehari tu.

Iya mega madahka, lima ari sida ti ditan nya nyengkaum pekereja premis nya empu.

Iya madahka, semua sida nya udah diasuh ngelawa Indu Opis Polis Pelilih Kuching (IPD) ungkup pansik bukai.

Kelimpah ari nya, iya madahka ukum kompaun ti dikeluarka sida mesti dibayar ba Opis Pengerai Pelilih Kuching dalam timpuh 14 hari ke penyampau RM1,000 siku.

Iya nyemetak madah, polis enda ngerara agi tang terus ngeletak kompaun ngagai premis enggau mensia mayuh ti enda nitihka SOP nyaga takah.

Ku iya, pengawa nya mesti digaga dikena nagang pengerekai igi penyakit Covid-19 ti dipeda majak ngerekai baru diatu.

Nangkan nya, mensia mayuh kelebih agi orang dagang enggau mensia mayuh dipinta seruran nitihka gerah perintah dalam timpuh Atur Tagang Pejalai Penyuman (PKPP) ngambika SOP dikena nagang pengerekai penyakit nya ulih dijapai.

Suara Sarawak