CENTEXS tawar empat program latihan Tenaga Hijau

11 jam lepas

337 iku KIR ari genturung pendiau Darul Hana nerima kunchi rumah baru

Indun Silong
RUAI
28 Ogos 2022
4:17 pm

Premier Sarawak Datuk Patinggi Tan Sri Abang Johari Tun Openg (lima kiba) nyuaka Geran Pala Tanah enggau replika kunchi ngagai Tuai Komuniti Kampung Semarang KK Anuar Samat. Seraya dikemataka ari kina Sekretari Perintah Nengeri Datuk Seri Mohamad Abu Bakar Marzuki, Datuk Seri Wan Junaidi Tuanku Jaafar, Sapit Premier Datuk Seri Dr. Sim Kui Hian, Direktor Opis Tanah enggau Survei Sarawak Datuk Abdullah Julaihi, Datuk Zaidi Mahdi, Datuk Dr. Abdul Rahman Junaidi, DUN Speaker Tan Sri Datuk Amar Mohamad Asfia Awang Nassar, Datuk Julaihi Narawi enggau Dr. Hazland Abang Hipni ba pengawa ke diatur kemari.-Gambar RAMIDI SUBARI

KUCHING: Sepenyampau 337 ketuai bilik (KIR) ari Kampung Semarang, Kampung Panglima Seman Lama enggau Lot Tambahan udah mujur nerima kunchi rumah baru ba Blok 1A, Darul Hana.

Premier Sarawak Datuk Patinggi Tan Sri Abang Johari Tun Openg madahka pemansang Darul Hana sebagi ari Program Ngemaruka Mengeri (Urban Renewal) ti benung dipejalaika Perintah Sarawak.

“Bisi 12 buah kampung di Seberang Hilir mungkur Jalai Tol enggau Jalai Demak tama dalam inisiatif tu dalam nambahka tikas pengidup rayat nengah transformasyen kandang menua lama ngagai sebuah kandang menua moden.

“Tu siti pengawa ti berat laban sekeda orang musinka projek tu ngumbai perintah ngambi tanah kitak, tang tu meh penguji kami lebuh deka ngemujurka pengawa tu,” ku iya.

Abang Johari bejaku munyi nya rambau bejadika Program Nyuaka Surat Pala Tanah, Chek Pampas Tanah enggau Kunchi Rumah Darul Hana sereta Bejadika Surau Blok 1A ditu, kemari.

Ku iya, pemar ti ditapi perintah ulih diseliahka laban niat ti manah deka dibantu Tuhan.

Baca lain Sikap diri ngena penemu mutar penusah angus

“Sehari tu (kemari), kitai ngemataka sekeda KIR pindah ngagai rumah sida ke alai taba rumah tu deka nyadi projek pemungkal ngagai pemansang kadang menua moden ke bukai.

“Kitai udah ngaga palan ti sama ba Kemuyang di Sibu, lalu diatu sida di Asajaya, Tembirat, Jepak Jaya enggau Gedong pan deka minta digagaka kandang menua moden ti sama,” ku iya.

Iya madahka, bisi lima blok rumah moden di Darul Hana deka digaga nampung projek nya nengah serikat pemaju Kaunsil Pemansang enggau Pengintu Tanah (LCDA) enggau Kaunsil Pemansang Pengawa Berumah (HDC) sereta Opis Tanah enggau Survei Sarawak (JTS).

Pemansang rumah di Darul Hana disikap enggau taba bepelasarka Kejiranan Pintar (Smart Neighbourhood) ti moden, betusun, likun, bepengerai enggau perengkaguna beteknologi tinggi.

Sebuah surau mega bisi digaga besemak genturung nya ti digaga ngena belanja RM4.28 juta lalu ulih nampung penatai mensia sepenyampau 460 iku.

Sama bisi datai Menteri ba Opis Menteri Besai (Parlimen enggau Undang-Undang) Datuk Seri Dr Wan Junaidi Tuanku Jaafar, Speaker Dun Sarawak Tan Sri Datuk Amar Mohamad Asfia Awang Nassar, Sapit Menteri Utiliti Enggau Telekomunikasyen ll Datuk Dr. Abdul Rahman Junaidi enggau bala bukai. -INDUN SILONG