38 atlit OKU Sarawak dipilih ke Filipina

KUCHING: Bisi 38 iku atlit Orang Nyelai Pendiau (OKU) Sarawak udah nyapai standard ditetapka Kaunsil Lumba Menua (MSN) dipilih nyereta Lumba Para Asean 2020 ke deka diatur ba Filipina.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka atlit OKU Sarawak deka bepekit ba Lumba Para Asean ungkup 12 lumba iya nya balapan, nyemerai, angkat berat, boling 10 pin, ping pong, badminton, catur, nimbak ke laja, boccia, kerusi roda bola keranjang enggau main bol cp.

Ku Fatimah, Mohd Nur Syaiful nyereta lumba nyemerai enggau Bonnie Bunyau Gustin nyereta lumba angkat berat ngarika menua ba Lumba Paralimpik Tokyo 2020 nitihka merit enggau prospek midul.

Fatimah mega madah, opis menteri iya udah ngatur program enggau projek ungkup OKU baka beratika penau enggau klasifikasyen dalam lumba.

Nangkan nya ku iya, pengawa tu dikena ngiga penau nembiak enggau atlit OKU ari Sarawak.

“Projek Elit enggau Raban Simpan OKU diatur KWKPK pun taun tu ngambika atlit Sarawak seruran belatih.

“Atlit tu dilatih enggau diberi peneleba bepekit ba renggat menua enggau pekit entarabansa,” ku Fatimah ba aum pemberita di Begunan Baitul Makmur ditu, ensanus.

Nangkan nya ku iya, bisi 131 atlit OKU Sarawak udah ngambi bagi ba pekit menua ungkup 12 lumba para kenyau pun taun tu.

Atlit OKU Sarawak mega kala nempa pemujur ba renggat nasional taun tu baka bulih siti midul emas enggau siti midul pirak lumba balapan ti mujur diempu Jap Soon Hung ba World Para Grand Prix 2019, Beijing China.

Pia mega, atlit nyemerai para Mohd Nur Syaiful ari Asajaya, Samarahan bulih midul engkeraju ba Pekit Dunya Lumba Nyemerai Para di London.

Ba lumba angkat berat para, Bonnie Bunyau Gustin ari Taie, Serian mujur bulih midul pirak ungkup kategori 65kg mangkuk dunya 10 Fazza Dubai enggau midul emas ba Pekit Angkat Berat di Astana, Kazakhstan.

Boling 10 pin para diarika atlit para Sarawak mujur mai pulai 3 midul emas enggau 3 pirak ba Pekit Dunya Bowling ba Thailand.

Berebak enggau nya, altlit bukai mega kala bulih pemujur ba lumba para baka Roni Tugiman (siti emas), Nur Shazwani (dua emas enggau siti pirak), Wong Kee Soon (dua pirak) enggau Dunstan Lim (siti pirak).

Ambrose Edau ari Kapit mega udah bulih midul pirak ba ASEAN Invitational Time Trial Event 2019 dalam lumba ensikal.

Kelimpah ari nya, Mohammad Farissan Jasnal ngarika Malaysia ba Thailand dalam lumba main bol cp seraya Jennyla Kueh enggau Wiro Julin ngarika sarawak ba lumba Tokyo 2020.