40 JKKK di Julau udah terima MRP

SARATOK : Bisi 40 Komiti Pemansang Enggau Pengelikun Genturung Pendiau (JKKK) buah rumah panjai ba Sitak Parlimen Julau udah nerima agih belanja ungkup Projek Mit Pemansang Menua Pesisir (MRP) minggu tu tadi.

Kaban Parlimen Julau,Larry Sng Wei Shien madahka penyampau agih MRP ke taun tu manggai RM629,350 nya disua lebuh iya ngabas rayat dalam kandang empat hari berunggu berengkah ari 20 nyentuk 24 March tu tadi.

“Mayuh projek pemansang lebih agi pemansang infrastruktur deka ulih diatur kitai jemah. Nya alai, aku minta semua peranak ditu (Julau) beserakup lalu begempung ngemansang ke menua.

“Diatu penanggul enggau penyuntuk rayat patut dikemerat . Ngetu dulu bepolitik laban tu mih maya kitai patut nulung rayat pengudah pangka pandemik Covid-19,”ku iya nengah sebengkah penerang kilah ensana.

Berebak enggau nya siku penerima MRP, TR Tukang Jarah ari Nyalak Atas,Pakan madahka diri chukup gaga sereta lantang ati laban MP Julau udah ngamatka iya.

“Terima kasih YB, bantu tu deka dikena manah ke pemaik kami serumah. Pemeri tu mega ngelai Kaban Parlimen Julau udah ngamatka semaya iya maya bekimpin ungkup Pengawa Bepilih Besai 2018 suba,”ku iya.

Sekeda JKKK bukai ke bela nerima MRP seha nya Rh EmpiTanjung Lelenggau, Rh Barang Sungai Empang enggau Rh Mullok nyengkaum Biro Indu Rh Empi enggau Rh Barang.

Suara Sarawak