405 jam berega dirampas

KUCHING: Opis Kastam DiRaja Malaysia (JKDM) Sarawak udah ngerampas jam mar rega mayuh bansa lebuh bejalaika operasyen sama ba dua Palan Bebelika Barang mengeri tu, Hari Tiga tu tadi.

Direktor JKDM Sarawak, Dato’ Sharifah Halimah Tuanku Taha madahka asil meresa silik ba dua kedai nya mujur tetemuka 405 unit jam ke apin dichukai.

“Semua barang dirampas berega RM16.412 juta enggau chukai penyampau RM820,607.67 ungkup pansik silik,” terang iya ditu tadi.

Ku Sharifah, jam nya dibai tama ari menua luar baka Hong Kong ngagai Padang Bilun Entarabansa Kuala Lumpur (KLIA) enggau transit ngena bilun domestik ngagai Padang Bilun Entarabansa Kuching (LTAK) nyeliah ari diperesa kastam.

“Dagang dibai tama terus ngagai Singapore ngagai LTAK ke alai jam nya dilalai dalam ‘brief case’ lalu lepas diperesa kastam laban dipadah nadai barang patut diperesa,” terang iya silik.

Nambahka nya ku iya, jam mar rega nya dibai tama siti-siti dikena ba jari nyadi barang sida empu ngambika pemesai kastam enda nemu lebuh ba pintu penama taja suah pansut enggau tama menua ngena chara nya tang mayuh jam udah dibai tama kia.

“Kes deka dipansik di baruh Seksyen 135(1)(g) Akta Kastam 1967, ( nguji nyeliah ari duti kastam) ke alai enti ditemu salah, sida deka diukum enda lebih ari 10 kali lipat penyampau duti kastam enggau enda ngelui ari 20 kali lipat penyampau duti kastma tauka dijil enda ngelui ari 3 taun tauka kededua sekali,” terang iya silik agi.

Halimah minta mensia mayuh meri kerejasama meri penerang bekaul sebarang aktiviti mai barang ditagang chara belalai tauka nadai permit import, sida tau telefon ngagai talian bebas tol Kastam ba lumur 1-800-88-8855, website http://aduan.customs.gov.my tauka ripot ngagai sebarang Opis Kastam ke semak ba menua tu.

Suara Sarawak