BELAGA: Opis Bomba enggau Penyah Penusah Malaysia (JBPM) Bintulu ngenukuka sepenyampau 407 iku nadai endur diau pengudah rumah panjai sida di Uma Bawang, Sungai Koyan, di Skim Pengentap Baru Pendiau Sungai Asap angus lengis ba penusah lemai kemari.

Kenu ku Ketuai JBP Bintulu, Mohamad Meramit, kesemua sida tu peranak ke diau ba dua ari lima blok rumah panjai di Uma Bawang.

“Sepenyampau 198 ari Blok D seraya 209 ari Blok E. Penusah dipelaba bepun ari siti bilik ba Blok D,” ku iya, ditibak ari Bernama.

Iya madahka kesemua sida ti tasah mujur ngelarika diri lebuh penusah nyadi tang siku indai tuai beumur 70 taun betu ba belakang lebuh tama baru ke rumah panjai nya laban deka ngambi barang.

Indai tuai nya udah ditaban ngagai Sepital Bintulu ngambika diperubat.

Kenu ku iya, tebal agi sida ti tasah diatu diau ngenduh ba rumah kaban belayan ti diau ba tiga blok bukai di rumah panjai nya.

Pun penusah nyadi enggau penyampu rugi agi dipansik, ku iya.

Raban bomba nerima kangau pasal penusah urung pukul 6.03 lemai lalu 11 raban enggau trak ari JPB Bintulu udah dikerah ngesah ngagai endur penusah nyadi.

Pejalai ngelawa endur nya urung dua jam pengelama nengah Jalai Bintulu-Bakun, ku iya nampung.

Sebedau raban sida datai, api mujur dirara urung pukul 7 lemai ari Raban Bomba Volunteer Uma Daro, Sungai Asap, betubuh 45 iku lalu operasi tembu urung pukul 2.21 dini hari tadi.

KARAM DI DARAT… Kurang ari 48 jam pengudah penusah angus di Balingian, dua blok Uma Bawang di Sunga Asap, Belaga angus lemai kemari.

Suara Sarawak