KUCHING: Sepenyampau 416 iku nembiak ari Swinburne University of Technology Sarawak mujur nerima skrol rambau Pengerami Graduasyen universiti nya sehari tu tadi.
Penyampau nya mungkur 207 iku nembiak dalam bidang dagang, 139 iku dalam bidang injinir, 19 iku dalam bidang langkar, 11 iku dalam bidang ICT, 24 iku dalam bidang sains komputer enggau enam iku dalam bidang bioteknologi.
Semua nembiak ti mujur nembuka pelajar tu ungkup sida ti belajar taun 2020 enggau 2021.
Pengerami nya mega digulu enggau penatai Premier Sarawak ti mega Pro-Canselor Swinburne University of Technology Sarawak Datuk Patinggi Tan Sri Abang Johari Tun Openg ba Palan Aum Borneo Kuching (BCCK) ditu pagi tadi.
Pengerami nya mega ngemataka empat iku nembiak universiti diaku Doctor of Philosophy (PhD) ba bidang Injinir enggau Sains.
Kelimpah ari nya, empat iku agi nembiak bulih master ba bidang Pengatur Dagang (Entarabansa), bidang Pengatur Pengawa Berumah (Construction) enggau bidang Dagang (Ngatur Pansik).
Rambau pengerami nya mega, bala ti bisi datai dipinta sama bela bediri meri tanda basa ngagai siku nembiak ari bidang Degree Injinir (Robot enggau Mechatronics) niang Adrian Prakasa ti mujur nembuka pelajar iya taja pan midang pun taun tu tadi.
Niang Adrian diarika menyadi iya, Agung Saputra, 34 ngambi skrol.
Nembiak ari bidang Degree Dagang (Akauntan enggau Pekara Wang) Tan Si Xuan ditukuka nyadi nembiak pemadu nyulut rambau pengerami graduasyen sekali tu.
Sama bisi datai Menteri Pelajar, Inovasyen Enggau Pemansang Penau Datuk Roland Sagah Wee Inn, Vice-Canselor Swinburne University of Technology Sarawak enggau Presiden Profesor Pascale Quester, Chairman Raban Director Swinburne University of Technology Sarawak Tan Sri Datuk Amar (Dr) Mohamad Morshidi Abdul Ghani, Swinburne Sarawak Pro Vice-Canselor enggau Tuai Pemesai Exsekutif Ir Profesor Lau Hieng Ho enggau apai indai nembiak.
