KUALA LUMPUR: Kaunsil Wang Turu Pelajar Tinggi Nasional (PTPTN) udah ngagihka belanja RM231,000 ngagai 462 nembiak Universiti Sains Malaysia (USM) ari ruang bilik tusah dikena ngelempung tating belanja sida.
Nitih penerang PTPTN, agih belanja nya entara inisiatif nengah Opis Menteri Pelajar Tinggi (KPT) nengah program Bantu Belajar KPT-PTPTN Siru dikena mantu nembiak ti tusah.
“Genap nembiak USM nya ari raban miskin enggau seranta ulih nerima bantu RM500 sekali terima enggau dipasuk dalam akaun bank nembiak.
“Program nya dipejalai enggau kerejasama Unit Pengatur Program (ICU) Opis Menteri Besai enggau USM nentuka penerima nya ari raban diselinting,” ku penerang nya.
Pengawa nyuaka Bantu Belajar KPT-PTPTN Siru ngagai nembiak USM udah diatur ba Masjid AlMalik Khalid USM, Pulau Pinang, kemari serimbai Pengawa Iftar USM ti dipenyadi Menteri Pelajar Tinggi, Datuk Seri Mohamed Khaled Nordin.
Sama datai Chairman Kaunsil Gabenor USM Datuk Seri Dr Awang Adek Hussin, Mandal Chanselor USM Prof Datuk Ir Dr Abdul Rahman Mohamed enggau Tuai Eksekutif PTPTN Ahmad Dasuki Abdul Majid.
Ku penerang PTPTN, inisiatif Bantu Belajar KPT-PTPTN Siru dipejalai dikena nyuaka bantu ungkup nembiak ba palan pelajar tinggi (IPT) bukai dikena ngelempung tating belanja sida.
“PTPTN seruran siruka pengelantang nembiak kelebih agi penyali PTPTN enggau nyendiaka bemacham inisiatif ungkup pemaik nembiak.
“Ngarap ke inisiatif Bantu Belajar KPT-PTPTN Siru tu meri pengelantang ngagai nembiak terus nempa pemujur ba akademik sereta ngemegah apai indai,” ku penerang nya. – BERNAMA.
