50 staf perubat Kuching positif Covid-19

KUCHING: Bisi 50 iku staf perubat Kuching dikenuku positif Covid-19 enggau 20 iku ari sida nya bekaul Kluster Kuching Conference seraya laluh 30 iku nya bekaul enggau kluster mit, ku Datuk Amar Douglas Uggah Embas.

Sapit Kepala Menteri ti mega Chairman Komiti Penyangga Penusah Ngenyit Nengeri (JBPN) nya madah, Sarawak sehari tu ngerikod semilan kes baru positif Covid-19.

“Ari kes positif baru Covid-19 tu ngujungka bisi 468 kes dirikod kenyau ari kes keterubah kena 18 March tu tadi.

“Ari semilan kes positif baru Covid-19 tu, tujuh kes ari Kuching enggau bela siti kes ari Samarahan enggau Serian,” ku Uggah ba aum pemberita pandemik Covid-19, ditu lemai tadi.

“Pia mega, 17 kes dirikodka udah suman enggau udah pansut ari sepital ngujungka sepenyampau 148 kes suman naka sehari tu.

DATUK AMAR DOUGLAS UGGAH EMBAS

“Ari 17 kes suman nya, 12 kes ari Kuching, Samarahan (4) enggau Betong (1),” tandu iya.

Nambahka nya, iya mega madah bisi 147 kes Pesakit Dipelaba Kena Rampit (PUI) dirikodka kemari enggau kes PUI tu nurun ari 257 kes sebedau tu lalu 499 kes agi nganti pemutus makmal.

Naka sehari tu, bisi empat Bagi Menua ti dirintia Zon Kuning sebedau tu udah berubah ngagai Zon Gadung iya nya Bagi Menua Mukah, Sarikei, Sibu enggau Mukah.

“Kebuah pia laban pelilih nya nadai ngerikod kes baru pengelama 14 hari ke udah,” tandu Uggah.

“Nya alai, aku nangkan mensia mayuh semampai nitihka semua atur ti udah dikeluarka sebedau tu kelebih agi sitak ti dirintai ari Zon Kuning ngagai Zon Gadung laban kitai agi ngelaban ngambi mutuska rantai Covid-19,” Ku iya nyemetak.