50 tuai ari Sabah, S’wak minta perintah bebasaka pemutus kort tinggi

KUCHING: Bisi 50 iku Kaban Parlimen (MP) enggau Adun ari Sabah enggau Sarawak selubang penemu minta Perintah Besai nerima pemutus Kort Tinggi Kuala Lumpur bekaul jaku ‘Allah’ dikena raban orang Kristian.

Dalam sempekat begulai 18 MP enggau 32 Adun ari Sabah enggau Sarawak minta Perintah Besai enggau rayat Malaysia nerima enggau bebasa lalu enda ibuh ngapil pemutus nya.

“Kami minta Perintah Besai enggau rayat Malaysia nerima sereta enda ngaga apil ngagai pemutus Kort Tinggi kena 10 March ti madahka jaku ‘Allah’ besibil enggau Konstitusyen Perintah Besai,” ku penerang sida begulai, tadi.

MP enggau Adun ti ngaga sempekat tu iya nya Parti Sa’ati Rayat Sarawak (SUPP), Parti Demokratik Progresif (PDP), PKR, DAP, Parti Pesaka Bumiputera Bersatu (PBB), PPBM, Parti Rakyat Sarawak (PRS), Parti Sarawak Bersatu (PSB), Warisan, UPKO enggau pengari rakyat ngatika kediri.

Ku sida, raban orang Kristian ti ngena jaku ‘Allah’ ba pengarap sebaka enggau raban orang Islam ti tebal agi orang Borneo enggau Orang Asli ti bejaku ngena Jaku Melayu nyadi jaku kedua tauka batang jaku.

Nya alai, penerang ari sida nya madahka pemutus Kort Tinggi semina ngemetulka pekara ke enda adil ti tau ngasuh orang Sabah, Sarawak enggau Orang Asli nyima ketegal penyumbung sekeda raban.

“Pekara tu enda ngeruga enggau ngelimpangka pengarap orang Muslim, kelalu nangi enggau nadai kebuah ti sengaja dilakika sekda orang di Semenanjung,” ku sida.

Suara Sarawak