56 sekula repuk di Lawas deka digaga baru

LAWAS: Lebih 56 buah sekula repuk ba Bagi Menua Limbang deka digaga perintah nengeri baru nengah Ejensi Pemansang Kandang Menua Utara (NRDA) enggau agih belanja penyampau RM1.5 bilion.

Kepala Menteri Datuk Patinggi Abang Johari Tun Openg nerang silik pasal pekara nya madahhka 56 projek ngaga baru sekula nya deka ngena chara tender.

“Sehari tu aku dipadah Lawas deka ngaga baru sekula repuk. Ukai ari Perintah Besai tang ari NRDA empu. Bisi 56 buah deka ditender.

“Diatu kitai bisi penanggul enggau Perintah Besai. Suba madah, kami (perintah besai) deka ngaga baru sekula repuk tang meseti bayar dulu utang. Bayar dulu (utang) baru kami ngaga, ku Menteri Wang,” ku iya maya Pengerami Bejadika GPS Zon Lawas, tadi.

Abang Johari madah Perintah Besai sebuah perintah ti enda nemu ngamatka semaya diri.

Ku iya, Sarawak udah mayar pulai utang RM700 juta baka ke udah dipinta Perintah Besai dikena ngepunka pengawa ngaga baru sekula repuk ba Sarawak.

Tang ku iya, nyentuk diatu pengawa ngaduka baru nadai dipeda dipejalaika perintah besai taja bayar keterubah RM350 juta ke udah digaga Perintah Sarawak taun nyin kemari dikena ngaduka baru 37 buah sekula repuk ba Sarawak.

“Aku madah enti baka nya (atur iya) kami mayar dulu utang. Nyadi kami pan mayar RM350 juta taun nyin kemari enggau pengandal awakka sekula 37 buah ke repuk nya digaga. Duit udah dibayar, tang nadai digaga nyentuk ke sehari tu.

“Bulan dua (Febuari) tu, aku mayar baru baka ke udah disemaya enggau sida (Perintah Besai) urung RM 350 juta, (ngujungka) RM700 juta (tang) siti tiang pan nadai dipeda.

“Tang di Lawas, nengah NRDA, nyau deka ditender lalu 50 buah sekula repuk nya ngena duit kitai empu ukai agi ngena duit sida taja pan duit nya endang duit ari kitai ditu,” ku iya.

Abang Johari mega madah tu endang mandang Perintah Sarawak nyengala sebuah perintah ke nemu ngatur belanja diri.

Ku iya, tu mega ningka tuduh Menteri Wang Lim Guan Eng ke ngumbai Perintah Sarawak deka bankrap dalam tiga taun.

“Kitai udah bisi ‘Credit Rating’ ti terang mandangka Sarawak tetap enda bankrap.

“Aku bisi model ‘Automotif Funding’ ke baru laban kaban kitai ba nengeri bukai nmega deka belajar ari kitai. Kitai udah numbuhka bank kediri empu lalu kitai nemu chara ngatur belanja, belanja ungkup projek enggau enda ngachau rizab,” ku iya.

Suara Sarawak