KUCHING: Sepenyampau 57 iti kes orang lenyau dirikodka ba bulan Januari ngagai Jun taun tu.
Direktor Opis Penyerara Api enggau Penyah Penusah Malaysia Nengeri Sarawak (JBPM), PKPjB Khirudin Drahman madahka penyampau kes tu niki dua peratus dibandingka enggau taun 2018 ba timpuh ke sama.
“Tu dipeda niki siti kes enti dibanding enggau taun 2018.
“Ba timpuh Januari ngagai Jun taun tu, JPBM ngerikodka 36 kes lenyau, tesat tauka telih ba kampung, 16 kes lemas ketegal labuh ba sungai tauka bot karam lalu lima kes lenyau ba tasik,” ku iya madah ba siti penerang berita.
Nangkan nya, Khirudin madah kes pengelenyau pemadu tinggi diterima sida iya nya kes lenyau, tesat tauka telih ba kampung.
“Kes tu nyengkaum mayuh bengkah umur, bansa enggau asal penatai.
“Lalu nitihka purata, tiap bengkah kes tu mujur diputarka ba pengelama tujuh hari, lalu operasyen ngiga enggau penyah penusah dipejalai 10 hari pemadu lama sereta dua hari pemadu jampat dirikodka,” ku iya.
Ba sepemanjai taun 2018, bisi 45 iti kes dirikodka lenyau, tesat tauka telih di kampung, 44 iti kes lemas ketegal labuh ba sungai tauka bot karam lalu dua kes lenyau ba tasik.
Lalu ba taun 2017, sepenyampau 48 kes dirikodka lenyau, tesat tauka telih di kampung, 37 iti kes lemas ketegal labuh ba sungai tauka bot karam lalu dua kes lenyau ba tasik.
