PENGUDAH empat taun, Malaysia dipadu baru nyadi champion All England kena malam Hari Minggu (21 March) tu tadi.
Malaysia mujur ngerampas gelar champion All England 2021 nengah siku pemain biak badminton menua, Lee Zii Jia peranak Alor Setar, Kedah mujur ngalahka pemain ba penuduk lumur dua dunya, Viktor Axelsen ari Denmark nengah poin 30-29, 20-21 enggau 21-9.
Sebedau dipadu nyadi champion, Zii Jia ba penuduk ke-11 dunya mujur udah ngalahka pemain ba penuduk lumur satu dunya, Kento Momota ari Jipun ba renggat Quater final nengah poin 21-16 enggau 21-19. Udah nya, ba renggat Semi Final, iya ngalahka pemain ari menua Belanda iya nya M.Caljouw nengah poin 21-13 enggau 21-17.
Ungkup penemu, Pekit All England nya entara pekit badminton pemadu tuai lalu pekit tu keterubah iya diatur dalam taun 1899.
Malaysia udah menang 14 kali lalu Lee Zii Jia nyadi pemain Malaysia keenam ti mujur bulih gelar champion pekit badminton All England.
Pemain Malaysia keterubah champion All England iya nya Wong Peng Soon ti ngempu gelar tu tiga kali iya nya ba taun 1951, 1952 enggau 1955
Udah nya kedua, Eddy Choong kala champion empat kali iya nya taun 1953, 1954, 1956 enggau 1957. Ditangkan ketiga, Tan Aik Huang ba taun 1966.
Udah nya, taun 2003 Hafiz Hashim mujur ngempu gelar champion Al England. Udah nya, lumur lima iya nya Datuk Lee Chong Wei kala menang empat kali mega iya nya ba taun 2010, 2011, 2014 enggau 2017.
Ari pemujur nya nya, dia Lee Zii Jia mujur mai pulai perais mata duit AS$59,500 tauka RM244,344.
Pemujur Zii Jia tu chukup ngemegah nama Malaysia ba tikas dunya lalu mandangka menua tu enda pungkang pemain badminton ti landik sereta dikeandal ulih nganti penuduk ke udah ditinggalka pemain lumur satu dunya sebedau tu ke mega ex-jaguh badminton menua tu Datuk Lee Chong Wei .
