600 peresa chulit ulih diambi dalam sehari

MIRI: Palan Pengintu Peresa Chulit Covid-19 ba Stadium Betutup Miri ulih bejalaika peresa chulit 600 iti ba timpuh sehari.

Menteri ti megai tanggung pengawa Komiti Penyangga Penusah Bagi Menua (JPBB) Miri, Datuk Lee Kim Shin madah, Stadium Miri udah nyadi Palan Sekali Ngetu kenyau ari 2 Ogos 2020.

Palan nya dikena ngeluarka atur kuarantin, ngena gelang jari, beperesa chulit, ngeluarka surat ngenukuka abis kuarantin sereta ngempat gelang jari.

“Palan Pengintu nya diungkupka tiga kategori beperesa chulit ngaul sida ti bisi semaya enggau Opis Pengerai Bagi Menua Miri iya nya sida ti bisi kontak semak ngagai kes positif enggau sida ti dipatau,” ku iya.

Kim Shin mansutka jaku nya lebuh ngabas Stadium Betutup Miri, ditu kemari.

Menteri Perengka Pengangkut madah, kategori ‘walk-in’ nya ungkup sida ke kala dalam endur ditukuka kes positif ari JPBNS sreeta sida ti deka beperesa chulit.

Pia mega, kategori ketiga nya sida ke mesti bisi pemutus peresa chulit ngambi nampung pejalai ngagai Limbang tauka Bintulu.

“Palan Sekali Ngetu nya ulih bejalaika 600 peresa chulit sehari kelimpah ngeluarka atur kuarantin, ngena gelang jari enggau ngeluarka atur abis kuarantin sereta ngempat gelang jari,” ku Kim Shin.

Kim Shin madah, semaya beperesa chulit ke ditaga udah dipejalai Opis Pengerai Bagi Menua Miri dikena bejalaika operasyen ba Palan Sekali Ngetu tu.

“Mayuh orang datai beperesa chulit sehari tu (kemari) mai sida sebilik bisi sekeda datai ngena kerusi roda.

Nya alai, mensia mayuh dilalau nitihka semaya beperesa chulit ti udah diberi Opis Pengerai Bagi Menua Miri dikena nyeliahka palan nya sekut enggau lama nganti dikena nentuka sida nitihka SOP,” terang iya.

Kim Shin mega minta JPBB Miri nyendiaka jalai kerusi roda, jalai bedarat sereta nyeleti jalai ke belingguk ba jalai besai tama Palan Pengintu nya ngambi nyaga pengelikun enggau pengelantang mensia mayuh.

Suara Sarawak