KUCHING: Bisi 71 anak patu ari Rumah Nembiak Mit Toh Puan Hajah Norkiah, Kuching enggau Rumah Nembiak Mit Datuk Ajibah Abol, Sri Aman nerima pemeri ari Kaunsil Pemansang Ekonomi Sarawak (SEDC).
Pengawa nyuaka pemeri nya udah dipenyadi Tuai Pemegai Menua (TYT) Tun Pehin Seri Abdul Taib Mahmud sereta bini iya, Toh Puan Datuk Patinggi Raghad Kurdi Taib ba Pengawa Bebuka Puasa, Sembiang Berjemaah Maghrib, Isyak enggau Tarawih SDEC Sarawak di Hotel Grand Margherita (HGM) Kuching kena 5 April tu tadi.
Berebak enggau nya, pengawa diatur SEDC Sarawak nya entara Program Tanggungpengawa Rama Korporat (CSR) ngaul raban kurang benasip manah nyengkaum nembiak mit.
Pengawa nya dipungkal enggau pengawa bebuka puasa ba Restoran Meisan, HGM seraya sembiang berjemaah Maghrib diatur di Dewan Asajaya. Seraya nya, bisi pengawa nyuaka pemeri enggau tepa ngagai nembiak mit.
Temuai ti bisi datai dinah pemakai ‘Macam-Macam Ada’ ungkup bufet Ramadan ti disediaka HGM di Poolside Pavillion.
Sama datai Sapit Menteri ba Opis Premier Sarawak (Pengereja Pengawa, Imigresyen enggau Patau Projek) Datuk Gerawat Gala, Chairman SEDC Tan Sri Datuk Amar Dr Abdul Aziz Husain, Menijar Besai SEDC Datuk Abdul Hadi Abdul Kadir, Tuai Pegawai Eksekutif Lembaga Amanah Kebajikan Masjid Nengeri Sarawak (LAKMNS) Datuk Abang Abdul Wahap Abang Julai sereta bala bukai.
