SERIAN: Palan Pengenduh Sementara (PPS) dibuka ba SK St Peter Simpok ditu tadi endur 72 tasah bah, nyengkaum enam anak mit ngenduh.

Siti PPS nya aja dibuka pengudah ujan nyadi ngelama 24 jam ba pelilih Siburan ti ngujungka sekeda endur ampuh bah sereta dituntung bah tunggal.

Ba sebengkah penerang kemari, Komiti Penyangga Penusah Nengeri (JPBN) Sarawak madahka PPS nya dibuka pukul 6 pagi ungkup 40 ruang bilik ba Kampung Simpok.

“Bisi 40 buah rumah ampuh peninggi setengah kaki ba Kampung Simpok ti ngujungka sekeda ruang bilik diasuh mindah.

“Jalai tama ngagai Kampung Simpok enda ulih ditengah lalu ai dia agi majak niki,” ku penerang JPBNS.

Empat endur ba Padawan enggau Samarahan dituntung penusah bah tunggal pengudah ujan bangat nyadi ngelama tiga jam lebih ba Kuching enggau Samarahan.

Sekeda endur dituntung penusah ba Serian iya nya Kampung Simpok enggau Kampung Mundai seraya ba Samarahan penusah nuntung peranak ba Taman Samarindah, Taman Muara Tuang enggau Taman Unigarden.