KUCHING: Sarawak ngerikodka 726 kes baru positif Covid-19 enggau empat kes pemati baru sehari tu.
Komiti Penyangga Penusah Nengeri (JPBN) dalam siti penerang media tadi madahka tebal agi kes tu dirikod ba Pelilih Kuching, Kapit, Sibu, Miri enggau Subis.
Pelilih Kuching ngerikod 159 kes, Kapit (73), Sibu (72), Miri (66), Subis (60), Bintulu (49), Samarahan (43), Pakan (28), Meradong (27), Selangau (16), Asajaya (16), Sarikei (15), Tanjung Manis (13), Beluru (13), Mukah (12), Serian (10), Matu (9), Pusa (8), Bau (8), Betong (5), Simunjan (5), Kanowit (4), Julau (4), Tatau (2), Saratok (2), Marudi (2), Song (2), Lawas (1), Sri Aman (1) enggau Sebauh (1).
Ari kes baru dirikod sehari tu ngujungka penyampau kes positif di menua tu nambah 46,162 kes lalu kes pemati mega nambah ngagai 280 iku.
Ku penerang nya, ari 726 kes baru ke dirikod, 41 iku bisi nunjukka kelai dirampit lebuh beperesa ke alai 568 iku endang ari orang ti diasuh kuarantin.
Ngelansa pasal kes pemati sehari tu, sida ke bebadi nyawa dua iku lelaki enggau dua iku indu ke beumur entara 58 ngagai 72 taun.
Semua sida mega bisi penyakit bukai baka darah tinggi, kemi manis, sakit lempuang enggau ke bukai.
